Yɛla Atan' sɔb

Dasaŋ si'a da bɛ, ka o yʋ'ʋr buon Abʋgʋr. Daar yinne ka o keŋ bʋnkʋdsɔ' yin ye ba sɔns. Bʋnkʋdʋg la yʋ'ʋri an Winna'ab.

Abʋgʋr:-          Sɔnsiga

Winna'ab:-       Yauu, kenken. Bɛkɛog kibarɛ?

Abʋgʋr:-          Bɛkɛog anɛ sɔnsig ka yɛl kae. Man wʋm ye fʋ da bɛ na'asaatʋma ni ka nyɛt girima, la'am nɛ fʋn kul yin la na, fʋ kpɛn nyɛt girima nɛ na'asi. Lin ka m kena ye m nyɛɛf ka fʋ sʋŋim nɛ linɛ ka fʋ mɔr la bi'ela ka m mɛ nyaŋi nyɛ na'asi m taaba ni.

Winna'ab:-       Fa' kenken. M na sʋŋif, amaa kɛl ka m baŋ si'eli fʋ san'an bi'ela. Fʋ tʋm ya?

Abʋgʋr:-          Mam bɛnɛ na'asaatiis ofisin.

Winna'ab:-       Ka fʋ tʋʋma ni, fʋ nyɛt laafi bɛɛ?

Abʋgʋr:-          Ayeei, nɛ fiin mɛnɛ.

Winna'ab:-       Bɔ ka fʋ pʋ nyɛt laafi?

Abʋgʋr:-          Mam bɛ tʋʋma nii yʋma anu nwa. Man la'an bɛ nɛ sieba la tɔlisnɛ ka man ma'aa kpɛlim. Hali banɛ da la'am bɛ man nya'aŋ wʋsa lɛn kena paae man ,  ka ti la'am bɛ. Onɛ da bɛ man nya'aŋ la na tɔlis nannanna lɛn niŋ man kpɛɛnm. Lina ma'aa yʋ'ʋn pakim hali ka li ka' sʋ'ʋm.

Winna'ab:-       Sidaa?

Abʋgʋr:-          Ɛɛn:

Winna'ab:-       Ka fʋ tɛn'ɛs ye bɔɔ sʋ'ʋe ka fʋ pʋ tɔlisida?

Abʋgʋr:-          Man kpɛɛnm la pʋ bɔɔdi maa.

Winna'ab:-       Bɔ ka fʋ kpɛɛnm la pʋ bɔɔdi fɔ?

Abʋgʋr:-          O yaamnɛ zaalim-zaalim.

Winna'ab:-      Fʋ kpɛɛnm la yaafnɛ zaalim?

Abʋgʋr:-          Ɛɛn, zaalim zaalim. M pʋ niŋ o si'ela.

Winna'ab:-       Bɔ ka fʋ ye o yaafnɛ?

Abʋgʋr:-          Tɔ, o daa keŋ na'asaateŋ yʋma atan' ka pʋ nyaŋi sɔbi di ya'annɛ. Hali yʋma anaasi nɛ anu naarin wʋsa, o gʋ'ʋŋnɛ.

Winna'ab:-       Ow, zubɛ'ɛdɛ, li tuon ka fʋn mɛ keŋ zamisʋg kan bɛɛ?

Abʋgʋr:-          Ɛɛn, man keŋ ya.

Winna'ab:-       Yʋma ala ka fʋ nɔkɛ?

Abʋgʋr:-          Yʋma ayi' ma'aa.

Winna'ab:-       Yʋma ayi' ma'anɛɛ?

Abʋgʋr:-          Ɛɛn, yʋma ayi' ma'aa.

Winna'ab:-       Yʋma ayi' la ni, fʋ di ya'an sɔb la naarin wʋsa nɛ yʋma ayi' ni ma'anɛɛ?

Abʋgʋr:-          Ɛɛn, man di ya'annɛ li wʋsa ni ka li pʋ tɔiya. man sɔbi li wʋsa nɛ yʋma ayi' ma'aa. Ka m kpɛɛnm la sɔb yʋma anu sa ka pʋ nyaŋɛɛ. O pʋ san'amnɛ ligidi la zaalim?

Winna'ab:-       Ka fʋ kpɛɛnm la mi' ye fʋ baŋ o yela la walaa?

Abʋgʋr:-          O mi'. Man ɛɛnti yɛt o on da gʋ'ʋŋ na'asaateŋ la yɛla. O na'asaal pian'ad ka' gbinnɛ, hali ka o ɛɛnti bɔɔd ye pa'al mam mɛn.

Winna'ab:-       On ɛɛnti bɔɔd ye pa'al fʋ la, ɛɛnti yɛl o ye bɔ?

Abʋgʋr:-          Man ɛɛnti nwa'as o nɛ ka o sʋnf duoe nɛ mam ye mam mi'i gat o la yɛla.

Winna'ab:-       Fʋ yɛla la zan'a laa?

Abʋgʋr:-          Ayei, ka' zan'a laa.

Winna'ab:-       Bɔɔ kpɛlim ka zabidi fɔ?

Abʋgʋr:-          Manɛ m zuanam ɛɛnti ken bɔkʋ da'ad la'ad sam ka nwadig kpi ka ti keŋ yɔ. Man ɛɛnti yɔ m sam wʋsa, hali ka m zuanam la pʋn pʋ yɔɔda. Su'osi sa an yɔɔd dabisir ka man sa keŋ yɔɔ m sam wʋʋ man ɛɛnti yɔɔd si'em la. Hali ka bam sa pʋ nyaŋi yɔɔ. Ka onɛ kuosid la ye man kʋ lɛn da' sam ya'asɛ.

Abʋgʋr:-          M ba'a, yɛlim suntaana la an si'el la.

Winna'ab:-       Fʋ yiiga daan la anɛ fʋ pian'ad pʋʋgin. Ti sɔnsig la ni wʋsa, fʋ pʋn pɔ.

Winna'ab:-       O yɛl fʋ linɛ sʋ'ʋeyaa?

Abʋgʋr:-          Ayei nɛ!

Wina'ab:-         Li zan'a la yʋ'ʋsaa?

Abʋgʋr:-          Li pʋ naae.

Winna'ab:-       Bɔɔ lɛn kpɛlim ka daamidi fɔ?

Abʋgʋr:-          Man yisɔb la ye nwadig ya'a kpii, man yim ka kɛ o yir.

Winna'ab:-       Fʋ zabid nɛ fʋ taaba banɛ bɛ yin la nɛ bɛɛ?

Abʋgʋr:-          Bi'el-bi'el, amaa ka'a saŋa wʋsaa.

Winna'ab:-       Ka fʋ ɛɛnti zabid nɛ o pu'ab la bɛ yin laa?

Abʋgʋr:-          ya'a aan o pu'ab la, saŋa wʋsa.

Winna'ab:-       Ka fʋ ɛɛnti zabid nɛ yidaan la mɛŋaa?

Abʋgʋr:-          Sansi'a bɛ ka ti nwa'as.

Winna'ab:-       Nannanna, m tɛn'ɛs ye li zan'a la, bɛɛ bɔ?

Abʋgʋr:-          Ayei, m nan pʋ yɛl bɛ'ɛd la naae.

Winna'ab:-       M bisʋŋɔ, bɛɛ kpɛlim?

Abʋgʋr:-          Hmm, m bɛnɛ dɔɔgʋn tɛn'ɛsidi m yɛla nwa, m nyɛnɛ (Mba'bɔɔd) m pu'a la kpɛn' na ka m tɛn'ɛs ye m nyɛ onɛ na sʋŋim ka m yɛla nwa maal. Ka' mam pu'a bɛog nɛ daarɛ.

Winna'ab:-       O yɛlif linɛ daam oo?

Abʋgʋr:-          Nɛ fiin mɛnɛ.

Winna'ab:-       M tɛn'ɛs ye fʋ yɛla la wʋsa wʋsa bɛ'ɛdi nwa.

Abʋgʋr:-          Oh, bɛdegʋ nam bɛ ka m na yɛlif.

Winna'ab:-       M dakɔɔnrɛ, mam pʋn wʋm si'el la pʋn siak man na maal tiim la tisif.

Abʋgʋr:-          Fa', M pʋ'ʋsya.

Winna'ab:-      M dakɔɔnrɛ, fʋ mi' ye suntaana bɛ dunia kaŋa nwa nii?

Abʋgʋr:-          Ɛɛn, suntaana galisnɛ.

Wina'ab:-         Li malisim fʋn ye suntaana galisnɛ la. Fʋ yɛla la anɛ suntaan ban'a atan' bɛɛ fʋ ni, ka fʋ ya'a pʋ yisi baa, fʋ na tʋm hali amaa li kʋ malisi fɔ. Fʋ na mɔ amaa vʋm na tɔi tisif.

Abʋgʋr:-          Fa' ka tisim tiim la ka m nyaŋi kadi ba.

Winna'ab:-       Man na tisif tiim la , amaa li bɔɔd ye fʋ baŋ sʋntaana atan' la ka nyaan nyaŋi kadi ba. O yɛl ye, m bɛlimnɛ, m pʋ'ʋs ya, bɛɛ naa nɛ. Fʋ baŋ yaa?

Abʋgʋr:-          M pʋ'ʋs ya, naa, pa'alim yiiga daan la naae.

Winna'ab:-       Fʋ pian'ad pʋʋgin, fʋn tisi fʋ kpɛɛnm bɛɛ fʋ kuos bɛɛ fʋ yidaan nɛ o pu'a la hali nɛ fʋ mɛŋ pu'a la fʋ pʋ tisi ba girimaa. Linɛ ka fʋ maan la anɛ fʋ mɛŋ bɔɔdim ka fʋ maannɛ tit nidib. Fʋ keŋ na'asaateŋi sɔbi di ya'an, ka fʋ kpɛɛnm la pʋ nyaŋɛ. Ka li niŋ bɔ? Linɛ na kɛ ka fʋ liebi fʋ kpɛɛnm la kpɛɛnm bɛɛ?

Abʋgʋr:-          Naa, ayei.

Winna'ab:-       Fʋ mi'i ayi' daan laa?

Abʋgʋr:-          Ayei, pa'alim.

Winna'ab:-       Ayi' daan la anɛ fʋ ittʋŋ. Fʋn paae na la fʋ pʋ nwɛ' kʋlʋŋ la nɛ datiuŋɔ, fʋ pʋ yɛl ye gaafaraa, fʋ yɛlnɛ ye tʋʋma. Mam pʋ tisif kʋkka ka fʋ gaŋi fʋ kʋkki vuugi fʋ ya'aminɛ keŋ zin'in. Fʋ pʋn pʋ zin'ine naae ka la'aŋe fʋ tabkɔnba. Fʋ pʋ yɛl ye gaafaraa ka mɔr nyɔ'ɔsi ugʋnnim. Ti sɔnsig la wʋsa anɛ tabkɔnba nyɔ'ɔs ma'aa. Gɔsim tampɛligim an si'em nɛ dɔɔg la? kuug vɔndʋg bɛɛ dɔɔgɔ?. M nɔki m kanfinigi bas ka fʋ pʋ nɔki tisima ka m gʋ'ʋŋ ka yɛlif ka fʋ nɔk nɛ agɔbigi tisim. Li an sida ye fʋ ittuŋ ayi' daanɛ la bɛɛ li ka' sida?

Abʋgʋr:-          Oh, ɛɛn li anɛ sida naa, m bɛlimnɛ, pa'alim atan' daan la.

Winna'ab:-       Atan' daan la m dakɔɔnrɛɛ, anɛ ye fʋ vʋm la an si'em la. Fʋ baŋ yaa?

Abʋgʋr:-          M pʋ baŋ sʋ'ʋŋaa, m bɛlimnɛ, pa'alima, ka'a Wina'am tis vʋm kaŋaa?

Winna'ab:        Mam pʋ siakɛ. Wina'am tisifnɛ niŋgbiŋ, ka fʋn mɛŋi na gɔsi fʋ niŋgbiŋ la sʋ'ʋŋa ka kɛ ka nidib nyɛɛf ka fʋ vʋm an sʋm. Gɔsime fʋ zuobid la an si'em, li paae yʋma si'em nwa fʋ pʋ pʋnɛ.

Abʋgʋr:-          Naa, li anɛ yʋʋmme nwa.

Winna'ab:-       Fʋn pum pʋ saansɛɛ li paae nwadigi nwa.

Abʋgʋr:-          Li anɛ daba atan' nwa ka m pʋ saansɛ.

Winna'ab:-       Din laa fʋ saans zinaa?, fʋ ya'a pʋ mɔr karigisi fʋ zugʋn la?

Abʋgʋr:-          Oh, ba bɛ bi'ela.

Winna'ab:-       Tɔ, m na maal tiim la tisif, kulim ka dabisa pisnaasi daar ka fʋ kena di'e tiim la.

Abʋgʋr:-          M pʋ'ʋsya bɛdegʋ, kpɛlim sʋ'ʋŋa. Li dabpiiga daar ka Abʋgʋr pʋn paae nwɛ' Winna'ab ka Winna'ab due ka ye, kpɛn'ɛm na.

Abʋgʋr:-          Gafar ya, nɛ ti bɛkɛogɔ.

Winna'ab:-       Bɔ? man yɛlnɛ si'el bɛɛ?

Abʋgʋr:-          Naa, fʋ pʋ yɛl si'ela. Man daa kena ka fʋ sa'alim si'em ka m lɛb la, m nyaŋi tiaki m vʋm la ka li yinɛ fʋ sa'alʋg la ni na. Nannanna, man daa lɛb la, li daba ayi' daar ka m yisɔb la yelim ye, da lɛn yii ka ti na la'am bɛ. Yimbɛogʋn ka m pu'a Mba'bɔɔd mɛ kan'as o la'adi lɛb na. Su'os ka m nyɛ ka kuos la tʋm biig na ye m ya'a ti nyɛ ligidi sansi'aa mam mɔr na ya. Yidaan la pu'ab nɛ o biis wʋsa ti yʋ'ʋn sɔnsidnɛ nwɛnɛ ba'abiis nɛ taaba, li kɛnɛ ka malisim yʋ'ʋn bɛ m pamm. Tiim lɛn kae gat nwa'. Wina'am na tisif fʋn bɔɔd si'el wʋsa, ka kɛ ka fʋ vʋm lalig ka fʋ mɛ sʋŋidi ti wala. Ow, Wina'am na zi'ene fʋ nya'aŋ.

Winna'ab:-       M biiga, mɔri m sa'alʋg la wala, ka m ya'a ti kae fʋn mɛ sʋŋi fʋ taaba, ka ban ma'ad la tiim kae. Tikpiilima nya'a nɛ kɔnbkpiilima gbana ka ba mɔri kɛt ka suntaana maliaka bɛ'ɛd na'ab la mɔri ti namisid dunia kaŋa ni. Fʋ sʋm zug ka fʋ buon nimbanɛ kpɛn' mɔɔgʋ lɛbisidi fʋ yisʋŋ pʋʋgin. Sʋŋim biig nwa nɛ o taaba banɛ ied sʋŋir ka pʋ nyɛta. Faanmɛ ba suntaana baŋin lɛbisi ba yɔlisim zin'igin. M sɔsid nwa' nɛ Fʋ biig Yesu Kristo yʋ'ʋr zug.

Abʋgʋr:-          Aaaami,ami,aami. M saama, m ka'a nɔɔri pʋ'ʋsidi fɔ. Kpɛlim nɛ Wina'am sʋmalisim. M kul ya.

Winna'ab:        Fa', mam mɛ pʋ'ʋsya, pʋ'ʋsim m pu'ayua nɛ fʋ yidim wʋsa tisim.