Wina'am Na Paas Mɔɔg

Wina'am Na Paas Mɔɔg: anɛ Kusaal sɔlʋŋ kanɛ pian’ad daʋ zʋnzɔŋ nɛ o dakɔɔnr ya’am daan sɔ’ yɛla. Sɔlʋŋ la pian’andɛ bigisid daʋ la nɛ o la nɛ da pʋ mɔr si’ela, hali la’am kɔ’ɔŋ pʋ’a onɛ na maal diibi tisi ba si’em, amaa ban da mɔr nɔɔr yinne ka siakid taaba pian’ad nɛ sa’ala la yɛla da kɛ ka Wina’am barigi ba ka ba ti kena lieb kpan’as gaad sɔ’ wʋsa ba teŋin la. Sɔlʋŋ la pa’al ye, daʋ la pʋ’a da kpinɛ ka bas on nɛ o dakɔɔnr la ma’aa. Ba da mɔrnɛ na’adagɔɔbir yinne ma’aa ka Wina’am nɛ kpi’im dɔlis na’agɔɔbir yinne la ni pi’eli ba nu’us nɛ kpan’am. Sɔlʋŋ la pʋtɛn’ɛr anɛ di pa’al nɔɔr yinne paŋ nɛ tʋmmir nɛ an si’em. Ala ka Wina’am gbaʋŋ yɛl ye, ba'abiis ya'a la'as taaba bɛ nɛ nɔɔr yinne, li anɛ sʋ’ŋa ka malisi galis la. Di ye li nwɛnnɛ malʋŋ kpaam linɛ ka ba bu'od niŋin Aaron zugin, ka li buoɛndi sigid o tieŋin, hali ti paadi o fuug nɔgbannin si’em, ka lɛn nwɛn wʋʋ Hemon zuorin mɛligim nɛ lit Zion Zuorin si'em la. Di ye, ani ka Zugsɔb la tisidi O albarika, hali nɛ vʋm linɛ bɛ saŋa linɛ kae naarɛ. Daʋ kaŋa nɛ o dakɔɔnr la vʋm bɛllim da pa’al ye, yɛlʋg kaŋa anɛ amɛŋa. Sɔlʋŋ la bɛ teŋin la.

Daʋ zʋnzɔŋi da bɛ, ka o pʋ’a kpi ka bas o ka on nɛ o dakɔɔnr yinne kpɛlim. Ban da kpɛlim la, ba sɔ'ɔsɔ’ da pʋ mɔr pʋ'a, ka lɛɛ mɔr na'aratita'agɔɔbir yinne ma’aa. Daar yinne ka biig la gɔs kii, ka buol ye, m ba'a, ka o saam la siak, ka o yɛl o ye, nannana, m mi'i ye fʋ anɛ m saam ka mam mɛ aan fʋ biig, amaa kɛl ka ti zaŋi ti na'ayimmir la kuosi tiak da' na'anya'aŋi bas ka daasieri o na ti dua ka li nɔbig ka ti nyɛ nyɔɔdi suŋi ti mɛŋ nɛ ti bɛllim. O saam la da pʋ ki'isɛ ka yɛl ye, m biiga, m pʋ ki’isi fʋ nɔɔrɛ, zaŋim naaf la giligi kuos. Amaa, mam bɔɔd si'el anɛ ye, onɛ da'a naaf la si'em sa ka pʋ yɛl ye, Wina'am na paasɛ, fʋn da di'e. Amaa, ka onɛ da' naaf la hali baa nɛ si’em wʋsa ka yɛl ye Wina'am na paas, fʋn di'em na ka Win'am sid na paas.

Haya, ka biig la zaŋ naaf la duoe mɔr gilib tat-tat-tat ɛɛnti paae lɔsi'a, ka ba da' yɔn pisi nɛ zak-zak ka pʋ tiɛn yɛl ye Win na paasɛ, ka o mɔŋi ba. O da ɛɛnti paae zin’isieba ka sieba tis na'asa'as hali ka pɛ'ɛs ligidi ka pʋ yɛl ye Win na paasɛ, ka o mɔŋi ba.

Biig la ti yuolim nɛ paae sɔ' yin, ka daʋ sɔ’ nɛ o dakɔɔnr zin'i samanin zaam nɔɔr ka o paae na ye o kuosidi o naaf la nɛ, ka biig la ye o saam da'am, ka o saam la ye o ka'a ligidi na da'a. Ka biig la yɛli o saam la ye, ka ka'a mɔɔdi la ka o kia ti'ili-ti'il la? Ye o ti'igim mɔbɔbin yinne da' naaf la ka Win'am na paas, ka o saam la la‘ ka ye, ba mɔr mɔbɔbin yinne da’ad naafɔ? Ani ka naaf sɔb la yɛl ye, ɛnhɛɛn, ye on saam pa’a yɛl o nɛ ye, onɛ wʋsa ti da' naaf la ka tien yɛl ye Wina'am na paas, on tisim o sɔb naaf la ka Wina'am sid na paas. Dinzugo, ba mɔr mɔbɔbin la na ka on na tisi ba naaf la.

Ani ka ba nɔk mɔbɔbin la na ka biig la di’e ka zaŋ naaf la n tisi ba. On da di'e o mɔbɔbin la ka pʋ’ʋsi ba sʋ‘ʋŋa ka di'e o yisuor nɛ o mɔbɔbini kullɛ. On da ti yɔi yir la, ka saa kʋ fʋkid ilililiil, ka li mɛ an sisɔb paal, ka o paae samanin na, nɛ mɔɔg la lɔb zɔŋ za'anɔraugun, n tud zɔŋin ka kpɛlim zɔɔ dɔl yaŋirini kpɛn' zakin ye o bian'as la'ad ka naan yina pʋ'ʋs o saam la on pa‘a kpɛlim si'em. Zi’i ka on tud mɔɔg la zɔŋin la, o saam la pʋ baŋɛ, ka biig la nɛ nam bɛ zakin la n bian'asid la'ad ka saa la mɛ fʋkid la, ka waad mɔri o saam la ka o babin zɔŋin la ied sa'ad ye o nwɛ' kɛnbiri nyu'ue bugum, o saam la da babin zɔŋin la ied sa'ad ye o nyu'ue bugum oos la, o da babili keŋ nyɛ mɔbɔbin la digi ka zi' onɛ digili lii. Ani ka o ba'aŋi fʋoe bi'ela n kɔ-kɔɔe n nwɛ’ kɛnbir la, on usig ka bugum la niŋ pillimm sansi'a la, ka o nini la mɛ kpɛlim lak nie nyain ka o nyɛt fasi. O biig la naam zakin yina la ka li malisi o saam la pamm ka o saam la kpɛlim bu'os o ye, ka anɔ'ɔnɛ zi mɔbɔbin la na digil ka man yisi la'aŋ bugum ye m ɔɔs waad ka m nini lakɛ? Ani ka biig la pʋ’ʋs o, on pa‘a kpɛlim si'em ka zaŋ lin niŋ si'em wʋsa n tu'as tisi o, ka li maligim ma'ae ba wʋsa sunya gaadi ala.

Li da pʋ nie bɛugɔ ka nidib pamm wum labaar ye yin la dim mɔr Wina'am na paas mɔɔg ka fʋ ya'a a zʋnzɔŋ ka die li bi'ela nyu'ue ka li la'aŋ fʋ nini kɔ‘ɔŋ na lak nie nyain ka fʋ nyɛt su'uŋa. Di da anɛ ala ka zu'omnam yit kateŋ-kateŋi n kenna di'esid mɔɔg la. Asida, zu'om wʋsa ya'a da kena, o yisidnɛ mɔɔd la bi'ela n tuanki tis o ka saae o naaf. O sɔb ya'a sid mɔri paae yin niŋ bugum usig ka li ti la'aŋ bugum pielim pillimm la, ka o nini mɛ kpɛlim nie nyain ka o sɔb nyɛt su'uŋa. Li da niŋidnɛ ala ka zu'omnam banɛ keŋi o sa'an la wʋsa mɔr naaf, naaf na tisid daʋ la nɛ o dakɔɔnr la ka di’esid Wina’am na paas mɔɔg la ti’ebidi ba mɛŋ. Daʋ la nɛ o dakɔɔnr la da zaŋnɛ naaf yinne la ma’aa kuos tis ka di’e mɔbɔbin yinne, amaa ka da yʋ’ʋn panr hali n lieb arazak dim bɛ teŋ la pʋʋgin.

Lin ka ba ye, ya ya'a la'asi bɛ yin ka siakid taaba nɔɔr, ka ya fara bɛɛ namisug pʋn tun'e ka zu'oe si'em wʋsa, bɛog sa, ya saa na paami ya mɛŋ ka ya sunya ma'ae la.