Wina'am Gbauŋ:Nɔnaar Kʋdʋg:Nahum

Gbauŋ nwa' yɛla

Nahum da tis Wina'am labaar Ninive linɛ an Asiria teŋ tita'ar la yɛla. Asiria nidib la da mɔri paŋ ka an bugusnam ka Nahum bigis Ninive san'auŋ la yɛla. O da nyɛya ka li anɛ Wina'am na tɛɛgi ba tʋbir. Teŋgbauŋ ya'a bɔɔd din mɔr paŋ si'em li kʋ nyaŋi luak Wina'am tʋbtɛɛgirɛ. Wina'am gu'usid nɛ o sʋnpɛɛn amaa nidib ya'a pʋ tiakɛ, o tʋbtɛɛgir la na kɛɛn ba san'an na (1:3).

Nahum 1

1 Labakaŋa anɛ Ninive yɛla ka Wina'am nie pa'al Nahum onɛ yi Elikos teŋin na la ka o sɔb.

Zugsɔb sʋnf pɛlig Ninive yɛla

2  Zugsɔb la anɛ Wina'am onɛ nyuun, ka an onɛ yɔɔd sam nɛ o sʋʋnr wʋsa: Zugsɔb yɔɔd o dataas wʋsa sam, ka o sʋnf pɛligid nɛ o bi'emnam.

3  Zugsɔb la sʋʋnr pʋ duod tɔ'ɔtɔɔ amaa o lɛɛ mɔr paŋ; ka lɛɛ kʋ bas tʋʋmbɛ'ɛd sɔb ka o keŋ zaalim-zaalim, asɛɛ o tɛɛg o tʋbir. O suor bɛ nɛ sisi'etita'ar nɛ sisi'epiliŋin, ka saŋgbana la aan o nɔba uusʋg.

4 Zugsɔb la tisid nɔɔr ka Atɛuk kpiɛnd, onɛ kɛt ka kɔlis la wʋsa kʋdigid; Basan nɛ Kaamel zuoya mɔɔd la zɛndig nɛ, ka Lebanon tiis puum linɛ vɛnl la wʋsa sʋʋg.

5 Zuoya la na dam, ka zuobibis nyɛlig. Teŋ la mi'im o tuon, nɛ dunia la zin'ikanɛ ka nidib bɛ wʋsa.

6 O sʋʋnr ya'a duoe, anɔ'ɔnɛ na nyaŋi zi'enɛ o tuon bɛɛ kpɛm bɛɛ o ni, o sʋnpɛɛn la saŋa? O sʋnpɛɛn la kpa'adnɛ nwɛnɛ bugum nɛ, ka tampiins wʋsa nwa'adi widigid o tuon.

7 Zugsɔb la an sʋ'ʋŋa, fʋ ya'a ti bɛ yɛllin, onɛ aan fʋ suak zin'ig; o sʋŋid banɛ niŋ o yadda la.

8 Amaa Ninive tempʋʋg la wʋsa, o na kɛ ka ku'om dii li ka li naae, ka kad o dataas wʋsa kpɛn'ɛs likin.

9 Bɔɔ kɛ ka ya gban'e pʋtɛn'ɛbɛ'ɛd Zugsɔb la yɛla? O na li' ya wʋsa vuguri ka li naae.

10 Ba na tʋ'ʋsid wʋʋ banɛ bug daam nɛ, ka bugum na dii ba nwɛnɛ gɔn'ɔs nɛ mɔkpi'emis nɛ.

11 Ninive, sɔ' nam mi' yii fʋ san'an na tɛn'ɛsid bɛ'ɛdi tisid Zugsɔb la, ka sa'an nidib sa'al bɛ'ɛdɛɛ.

12 Amaa Zugsɔb la yɛl ye, “La'an nɛ ban mɔr sʋŋidib ka ba an bɛdegʋ la, ba na kɛnsigi ba bɛn la ka li naae. Amaa namiskanɛ daa paae yanam Juda dim la, m kʋ lɛn namisi ya ala ya'asɛ.

13 Nannanna m na yis yu'asin la ya niŋgɔnya ni ka san'am bana banɛ lɔɔ ya nu'us wʋsa.”

14 Zugsɔb la tis nɔɔr Ninive dim yɛla, ye, “Ya kʋ mɔr yaas ka ba pʋdigi ya yʋ'ʋrɛ. M na san'ami ya bada banɛ ka ya mɛɛ zi'el la wʋsa. M na tuu ya yaad, bɔzugɔ ya ka' vɔɔnrɛ ka li pʋ nar ye ya vʋeya.”

15† Gɔsima, sɔ' mɔr labasʋŋʋ yit zuoya ni kenna, O pian'ad anɛ suguru nɛ sumbʋgʋsʋm. O yɛt ye, “Yanam Juda dima, maalimi ya malima la di'ema, ka yɔ yanamɛ kaanb si'eli zi'el la. Bɔzugɔ nimbɛ'ɛdnam kʋ lɛn nyaŋi yaa, ba na paam san'auŋ.”

Nahum 2

Ninive san'auŋ yɛla

1 Ninive dima, ya dataas kenna ye ba san'ami ya. Gu'umi ya teŋ la zaŋguoma la! Gɔsimi suoraad la ni! Ka ti'ebi ya mɛŋ nɛ zaba la'ad wʋsa.

2 Zugsɔb la na lɛbis Jakob girima la ya'as ka li nwɛnɛ Israel dim girima la, la'an nɛ san'auŋ dimi da kena san'ami ya tɛɛns nɛ ya pɔɔd wʋsa la.

2 Ya dataas zaba gbanti'edis la anɛ bʋn wiid, ka zabzabidib la zaba fuud an fuzɛn'ɛs. Ba zaba tɛrekonam anɛ kʋnt ka nyɛɛnnɛ ian'ad pil-pil, ka ba soogianam la ʋkidi ba kpana agɔla gɔla.

3 Tɛrekonam la widignɛ dɔl teŋ la suoya wʋsa, ba zɔtnɛ ken tuon ka lɛbid nya'aŋ zin'ig wʋsa. Ba nwɛnɛ bugum pielim nɛ ka ian'ad wʋʋ saa nɛ.

4 Ka Na'ab la tansi buol o zabzabidib tuongatib, ka ba zɔti kenna ka tu'usid. Ba dataas la zɔɔ paae teŋ la zaŋguomin ka mɔr gbanti'edis ye ba lusi ba mɛŋ.

5 Ka za'anɔya banɛ kpi'e kɔldaug la yɔ'ɔs ka na'ayir la wʋsa li.

6 Ba nyaŋ teŋ la dim wʋsa ka mɔri baa kul ka ba liebi ba yammis. Ba pu'asada la wʋsa bibigi ba nyɔ'ɔg nɛ sʋnsa'aŋ ka kaasidi limisid taaba wʋʋ dawana nɛ.

7 Ninive nidib la nwɛnɛ mu'ar ka li zaŋguom aaɛn, ka li ku'om wʋsa pʋbidi gat,ka nidib la kaasid nɛ kʋkɔtitada yɛt ye, “Zi'enimi! Zi'enimi!” Amaa sɔ' pʋ gi'e gɔs bɛɛ zi'enɛ.

8 Ka ba yɛt ye, “Faanmi anzurifa nɛ sanlima la'ad la!” Bɔzugɔ teŋ la kpan'am ka' naarɛ, li arezak la bɛ zin'isi'a wʋsa.

9 Ninive yʋ'ʋn kpɛlimnɛ zaalim, ka pʋ lɛm mɔr vɔɔnrɛ; Ba pʋtɛnda nɛ ba sʋnf wʋsa san'amnɛ, ba duma la bʋknɛ, ba niŋgbina wʋsa kiridnɛ, ka ba nindaas pɛlig.

10 Nannanna ya tempʋkanɛ da nwɛnɛ gbigima buug la bɛ yaanɛ? Zin'ikanɛ ka ba da diisidi ba gbigimbibis ka gbigim nya'aŋ nɛ gbigimdaug nɛ ba biis gɔɔnd ka dabiem kae la bɛ yaanɛ?

11 Gbigimdaug la daa gban'ad ni'im buudi wʋsa ka li tigid o yidim ka kpɛlimid o gbɛɛnsirin la.

12 Zugsɔb Paŋtita'ar Sɔb la yɛl ye, “Baŋim ye man anɛ fʋ dataa!” “M na nyu'oe fʋ zaba tɛrekonam la nɛ bugum, ka kɛ ka m zaba sʋ'ʋg la bɛɛns gbigimpɔla la wʋsa. M kʋ kɛ ka bʋnkɔnbid banɛ ka fʋ kʋʋd la baa yinne kpɛlim. Sɔ' kʋ lɛn wʋm banɛ aan fʋ tʋmtʋmnib la kʋkɔrɛ.”

Nahum 3

Ninive dim na paam tɔɔg

1 Yɛltɔɔg bɛ teŋ kanɛ an ninkʋʋdib la zug! Teŋ la pɛ'ɛlnɛ nɛ dama'am dim nɛ faandib gʋllim, saŋa wʋsa ba kʋdim bɛ nɛ faanbin.

2 Kɛlisimi ban fiebid widi ka li dammid si'em; ka tanp tɛrekonam zɔt ka li vuudi dʋt agɔla si'em! Widi la zɔt ka li dammid parigid-parigid, hali ka tɛrekonam la mɛ dammid ka yɛ'ɛm.

3 Wiedban'adib la duoe zabid nɛ nimmua, nɛ ba sʋ'ʋbanɛ dit ka ian'ad pidʋ-pidʋ la, ba ʋgisidi ba kpana banɛ pʋlim la agɔla, gɔla! Ba pu'alim ka kʋ nidib hali ka li ka' bɛnnɛ, ninkpiilima yadignɛ zin'is wʋsa ka nidib tu'usidi ba.

4 Nwa' wʋsa anɛ Ninive onɛ nwɛnɛ pu'agɔɔndir la kʋkɔma'asim zug; ka o zaŋ sɔɔng nɛ ba'abʋgʋsim pan'as tɛɛns la ka ba kilim yammis,ka nyaŋ buudi la wʋsa nɛ o sɔɔng.

5 Zugsɔb Paŋtita'ar Sɔb la yɛl ye, “Baŋim ka man anɛ fʋ dataa!”, “M na lidigi fʋ fuug la pili fʋ nindaa ka kɛɛf biel, ka dunia dim wʋsa nyɛɛ fʋ nyan paalʋ.

6 M na kɛ ka ba nɔk bʋnfɛn'ɛsa lɔbif, ka nɛ'ɛsif ka ziemif hali, ka sɔ' wʋsa gɔsid ka la'adif.

7 Sɔ' mɛkama ya'a nyɛɛf, o na zɔ ka basif, ka yɛt ye, ‘Oi, oi! Ninive san'amnɛ! Ka anɔ'ɔnɛ na fabil o yɛla? Yaanɛ ka m na nyɛ sɔ' ka o bɛlis o?’”

8 Fʋ tɛn'ɛs ye fʋ anɛ sʋ'ʋm gat Tebɛs teŋ kanɛ bɛ Nail kɔldaug baba ka ku'om giligi li laa? Kɔldaug la aan o gu'ud, ka ku'om la aan o zaŋguom.

9 Kus teŋgbauŋ nɛ Egipt da sʋŋid Tebɛs, ka mɔr paŋ tita'ar kanɛ ka' bɛnnɛ. Put nɛ Libiya tɛɛns la da zi'e ba nya'aŋ.

10 La'an nɛ wala wʋsa ba da nyaŋ teŋ la ka mɔr o nidib la lɔ'ɔŋ teŋ zʋŋ ka ba lieb yammis. Ba fanbi ba biliesi kʋʋ bas suoya la ni yɔɔg-yɔɔg. Ba maal bʋgʋlʋm-bʋgʋlʋm gaans nintitada la, ka gban'e na'ayikpɛm la lɔ nɛ bana.

11 Fʋn mɛ na nyɛ namisʋg wʋʋ nidi na kʋʋlnɛ fʋ na zɔti ieed suak zin'ig ka na ieed su'asigi fʋ dataas zin'igin.

12 Fʋ teŋ kpi'ema la wʋsa na nwɛnɛ kekama tibanɛ walaa bi'ig, ka ba ya'a mi'imi ba walbi'ima la na lut onɛ dit la nɔɔrin.

13 Gɔsimi fʋ zabzabidib la, ba anɛ pu'ab! Fʋ teŋ la za'anɔya la yɔ'ɔgnɛ tisi fʋ dataas; ka bugum di dalamma banɛ puugid dɔɔd la wʋsa.

14 Wikimi ku'om digili ka ti'ebi gur ka ba na ti gilig teŋ la! Maalimi fʋ zaŋguoma nɛ dalamma la ka ba mɔr paŋ! Nɔnimi ya'ad la, nɔɔmi tan la maalimi zaŋguoma la zin'ibanɛ san'am la!

15 Anina ka bugum la na diif. Zaba sʋ'ʋg la na ki'e fʋ kʋ nwɛnɛ sisɔma ɔnbid mɔɔd si'em la. Wiakimi nwɛnɛ sisɔma nɛ ka wiak wʋʋ na'azɔmnam nɛ.

16 Fʋ kpikpinkpinnib nɔbignɛ hali ka ba kal gaad nwadbibis. Amaa ba nwɛnɛ na'azɔmnamɛ na luu yadig teŋinnɛ, ɔnb si'el wʋsa ka lɛn iank.

17 Fʋ kpɛɛmnam la nwɛnɛ na'azɔmnam nɛ, ka fʋ gbauŋmi'idib la nwɛnɛ sisɔma banɛ tab zaŋguom bɛogʋn ka winnig ya'a ti tans ka ba iank ka sɔ' zi' ban keŋ zin'isi'a.

18 Fʋn Asiria Na'aba! Fʋ kɔnbkemnib la gbisidnɛ, ka fʋ nintitada la mɛ digi vʋ'ʋsid. Banɛ kpɛlim la widigi dʋ zuoya ni, ka sɔ' kae na la'asi baa.

19 Si'el kae na nyaŋi ti'ebi fʋ fɛn'ɛd la, bɔzugɔ sapu'ad la zu'oe siak fʋn na kpi. Onɛ wʋsa wʋm labaar la, pʋ'ʋsidnɛ nu'usi fʋ luug la yɛla. Bɔzugɔ, nid kae ka fʋ pʋ namis oo?