Fʋ tʋm bɔ

Fʋ tʋm bɔ anɛ Kusaal sɔlima gbauŋ.

PƲ'ƲSƲG

M yiiga pʋ'ʋsim kennɛ Yesu Kristo Wina'am biig la ni nɛ ya'am kan ka o tisim ka m nyaŋe sɔbi m yiiga gbauŋ bil kaŋa la. M mɛ lɛn mɔr barika pʋ'ʋsim tisid Akara Presbyterian church nidib wʋsa, li kas kas anɛ banɛ kpɛ'ɛŋim ka m nyaŋe sɔb la. Gbauŋ kaŋa anɛ ye li kpɛ'ɛŋ kʋsaas nɛ bane wʋm kʋsaal pian'ad la ka ba mɛ kpɛ'ɛŋe ba mɛŋ ka sɔb kʋsaal. Li lɛn ye li kɛnɛ ka sɔ' wʋsa nɔk kʋsaal zamisʋg nɛ nimmua.

M mɔr pʋtɛn'ɛr ye m na sɔb gbana bɛdegʋ.

M SIA ZABID

Awin nɛ Akɔlʋg sa pʋ nyaŋe gbis yʋ'ʋŋɔ. Kʋʋri sa bɛ kpalʋg pʋʋgin ka ba sa keŋ. Hali na'asaagɛna (dɛknam) sa pɛ'ɛlnɛ ka ba wa' hali gaad ban ɛɛnti wa'adi ba buudi di'ema si'em la. Na'akim nɛ pu'asada sa anɛ agɛllʋ. Di'ema la sa pʋdig yʋ'ʋŋ la ba yʋ'ʋn sa kpɛn'nɛ nyamis tʋʋma. Akɔlʋg sa nyɛnɛ pu'asadir ka o bii' man'ae bʋrr hali gaad Akara maŋʋnam ka o siisi buol pu'a la.

Awin                   Ti yʋ'ʋn kʋ kulɛɛ? bɛog bɔɔdi nier.

Akɔlʋg                   Man niŋgbina niŋɛ mililili (bɔzugɔ o nyɛnɛ pu'asadir ka o gaad o tuon).

Awin                      Ka fʋ niŋgbina ya'a niŋ mililili nɛ, fʋn nɔkim sɛwiesi ɛnbisi fʋ mɛŋ wae.

Akɔlʋg                   M zua, kem sa! fʋ zi' si'el wae. Pu'asadir la suoenme gaad la ka li mun bɛɛ.

Awin                      Li ya'a an ala, fʋn kɛl ka ti buol o.

Akɔlʋg                   SSSSS (siii) ka o siisi buol pu'a la.

Ba yʋ'ʋn buol pu'a ka o kena ka ba pin'ili sɔnsid, ban ti sɔnsi naae la ka Akɔlʋg yɛl pu'a la ye o kem buol o tiraan na ka ba zi'eli ba ka ban bɔɔdi kulug. Bupuŋ tɛn'ɛs ye ba di'emmɛ ka buol o tiraan na ka ba yʋ'ʋn mɔr ken nɛ ken. Ba keŋɛ ala ti paae zin'ikane lal nɛ dabɔɔg la. Ka Akɔlʋg nɛ o zua Awin yʋ'ʋn zin'in teŋin ka yɛl pu'asada la ye ba diinme ba. Pu'asad la ya'am da ianknɛ ka li lɛɛ malisi ba sunya. Awin nɛ Akɔlʋg da yɛl pu'asada la ye ba mɛ diginim ka ba diinba mɛn ka ba maal dakidi'ema. Awin nɛ Akɔlʋg diinb la daa bɛnɛ li kɔn'. Hali pu'asada la daa ki'a kuŋ bi'ela bɔzugɔ ba nan zi' nyɛ dinkaŋa buudi.

Pu'asadir yinne yʋ'ʋri daa an Ami'maalʋg. Akɔlʋg nɛ Awin daa basi ba ka niŋ babab n zɔ kul. Ami'maalʋg on daa pʋ nyaŋe duoe bɔzugɔ o daa zɛlnɛ. O zua la daa mɔ ye o tɛk o duoe gʋ'ʋŋnɛ bɔzugɔ o daa kaasidnɛ ye o siaa zabid. Dau sɔ' mɛ daa isigi wa'ae ye o dɔn'ɔs o gabʋ ka wʋm Ami'maalʋg kaasig la. Dau la daa maal sukpi'eme buŋe ti keŋ paae nyɛnɛ on digi kaasid ye o siaa zabid. Fʋ mi' dau la daa maal si'em? Sa'alimi fʋ bipumis nɛ fʋ biribis ka ba bas gɔnyaalis ka m nyaan yɛlif.

SA'AB DIIB MALIS KA LI MƆNIBI TƆE

Nwɛne siiliŋ la yɛl si'em ye; " bʋn wʋsa maalʋg tɔe ka li san'auŋ pʋ tɔe la". Apʋlis daa nyɛnɛ dau sɔ' ka o mɔr ligidi pamm. Dau la niŋgbina daa anɛ sʋ'ʋŋa hali saalim bɔl-bɔl-bɔl ka o lɛm mɔr pun'pun'. Apʋlis daa bu'os dau la ye, "fʋn nu'ug tʋʋm an bɔ?" Ka dau la lɛbis ye, "man tʋmmɛ fʋn tʋm si'el la". M zua, Apʋlis daa lidignɛ ka o lɛm bu'os o ya'as ye fʋ ye bɔɔ? ka dau la ansig o yɛlkpan la mɛŋe yɛl Apʋlis ye on anɛ yʋ'ʋŋ sakur na'asaara. Apʋlis n daa wʋm ye  yʋ'ʋŋ sakur yɛla la, o daa bu'os o mɛŋ ye, "asida ka yʋ'ʋŋ sakuri kɛ ka dau pun'oe anwaa?

Apʋlis mɛŋim daa duoe nɛ keŋ kpɛn' yʋ'ʋŋ sakur zamisʋg. Yʋ'ʋŋ sakur kariki la daa sid anɛ pa'an. La'amnɛ o mi'ilim daa bun wʋʋ kɔldaug la, Apʋlis daa pʋ nyaŋidi gban'adi li gbinnɛ. O zi'ilim la daa nwɛne fʋn na nɔk ki bielim suud bɔtʋ bɛɛ buorig kane mɔr vɔnya ni nɛ. Ba'asigɔɔ o daa gu'uŋe bas sakur ken nɛ; bɔzugɔ o pʋ gban'ad karʋŋ la gbinnɛ. La'amnɛ on daa bas la, yɔlisim daa ka' zin'si'a na tis o. Apʋlis daa kummɛ nintɔn'ɔma'asim nwɛne biig nɛ o zi'ilim la yɛla. Hali o daa gbin'e ku'om bas o win ye o sʋŋim o ka o zan'aŋ kʋsaal karʋŋ nɛ sɔb ka o na tis o pɛratita'apielig. Gɔsimi nidibi mugisidi ba mɛŋ si'em? Zɔlʋg ma'aa na yɛl ye, " m mi' bɛɛ m zi'i m ba'atɔɔgɔ".

Apʋlis daa niŋɛ ala nɛ ala ka ti nyaŋe baŋ karʋŋ nɛ sɔb. O mi'ilim daa yʋ'ʋn yɔ'ɔgnɛ nwɛne sinkpaam nyɛligi tu'asidnɛ, ka o yʋ'ʋn liebi ba sʋ'ʋlimin la yʋ'ʋŋ sakur na'asaara. Ba daa tis o pun'pun' zilim-gaand la ni nɛ sola lam line mu'oed bugum winnigin la. On nɛ o pu'ab nɛ o biis daa yʋ'ʋn ditti malisim gaad ba'amada. "Wina'am sʋŋide bane kpɛ'ɛŋidi ba mɛŋ". Bʋn faann pin'ilʋgʋ tɔe ka li naar anɛ siind nɛ sikir.

KIEM MƆMA'ASA LA DIGILI TI TISI FƲ BƲNKƆNBID SAA NAN NIID LA KA ƲƲN NA NIE KA MƆƆD LA KƲDƲG.

Atiig anɛ bʋmmɔr; niigi bɛ, kɔnbid nɛ pu'ab hali nɛ ligidi anɛ pun' mada. O yisnɛ yakkim yinne lɔɔd o niigi ka kpa'ad o kɔnbid. Ka o yinnɛ, nɔɔs anɛ sa'ad ʋʋn. Nidib pamm tisid o na'asi wʋʋ Bɔk na'ab nɛ. Amaa o yɛlkpan anɛ o pʋ kɛ ka o biis ken sakurɛ, o tɛn'ɛs ye o arizak la na kpɛm bɛ yʋma haaa. O mɛ yɛl ye on kʋ zaŋ ligidi digil baŋkinɛ bɔzugɔ on mɛ na tun'e sua.

Abʋʋzʋʋr anɛ nɔŋdaan. O nɔŋ la gbin anɛ ye o nɔknɛ o zaŋ-zaŋe gɔs o biis ye ba keŋ sakur. Hali o nɔbibis ya'a yuaki nɔbig bi'ela o na pisigi kuosi sʋŋ o biis la. On mɔɔdi ba bɛog yɛla. Haya, li pʋ yuugɛ ka saagil kena kʋ Atiig nɔɔs la wʋsa, li maali nwɛne nyalʋŋ nɛ hali ka baa nɔbil pʋ kpɛlim. On nan bɛ ani fabin sansia la ka bugum kpɛm niŋ pillim dii kpɛn kanb o dɔɔg mus-mus-mus, dɔkan ni ka o ligidi la mɛ bɛ. O azrizak yʋ'ʋn anɛ o niigi nɛ o kɔnbid la. Li daa maalnɛ wʋʋ nwadis anaasi ka sɛɛung yʋ'ʋn pɔnr; ka na'ayiis kena kad o na'abauk la wʋsa gaadi dʋ fanriŋ ka li fir. Li da nwɛne Wina'am kpa'ae o sunpɛɛn la tud o yin la nɛ. Tɔɔndir da sig o yin ka o kɔnbid la kpi, o yʋ'ʋn di'ed yaane? O daa kpinɛ nɛ ɛndʋg ka o biis la yʋ'ʋn lɛdigi maan fara bɔzugɔ, ba saam daa pʋ maal suokane ka ba na ti nyaŋe gɔsi ba mɛŋe o ya'a ti kpi ka basi ba. Li mɛ daa pʋ yuugɛ ka abʋʋzʋʋr biis la mɛ naae sakur ka paam na'asaatʋʋma tʋm ka ligidi yʋ'ʋn an bɛŋa. Abʋʋzʋʋr yʋ'ʋn daa ti niŋ vɔn', amaa biis la daa nyaŋe gɔsi ba mɛŋ bɔzugɔ, ba saam la daa bigisi ba suosʋŋ. Sɔ' wʋsa ya'a dittaa on tɛn'ɛsim o biis yɛla ban na ti an si'em o kum nya'aŋka da niŋ wʋʋ Atiig n maal si'em la.

KUGA LA'ASIDNƐ ZUORIN

Mmabʋn nɛ Asampuos anɛ nid nɛ o mabiig. Ba bɛlim la nwɛne amus nɛ o biis nɛ. Si'el wʋsa ba maannɛ azinzɛnma amaa Asampuos anɛ nɔŋdaan. O nɔŋ la ka'anɛ ye o anɛ gbanya'a, amaa ba yɛl ye li anɛ o yɛlʋg. Atɔ, daar yinne yʋ'ʋŋ ka o duoe ye on na keŋ buoɛn gɔs ye bɔ maal ka onɛ Mmabʋn pʋ tʋmme gat taabaa ka on kpɛn an o saanɛ? Dau sɔ' mɛ daa bɛ yanya'aŋe bʋgid wʋʋ nyaluŋnɛ. O daa sid keŋ paae ba'abʋgid la san'ane zaŋ o yɛla la wʋsa tu'as o. Ba'akɔlʋg sɔb la daa yɛɛg yɛla bɛdegʋ ziil o ka yɛl o ye, fʋ yɛla nwa ka m nyɛ; "Fʋ nyuunnɛ ka gbi'id ka line kpɛn gat anɛ fʋ pʋ titta. Saŋa wʋsa fʋn ya'a ɛɛnti nyɛ si'ela, fʋ pʋ pʋdigida. Hali fʋ pʋ basidi fʋ win ku'om. Amaa fʋ mabiig la ya'a ɛɛnti nyɛ si'el makama o ɛɛnti pʋdignɛ piiga yis yinne pʋ'ʋs Wina'am bareka. La'am nɛ zɛnvaandɛ o niŋidnɛ ala. La'amnɛ Mmabʋn n an bʋnmɔr la, zusʋŋ sia ya'a kenna, li sigidnɛ o san'an. O diib suoya kpɛm pʋbidnɛ ɔd-ɔdi sigid o san'an na nwɛne ku'om nɛ.Asampuos yʋ'ʋn ɛɛɛn gʋ'ʋŋɛ ya'ae nɔɔri guri, amaa li na pʋbi ieɛn o gaadi Mmabʋn kɔlʋgin la. Pɛbisim da'adnɛ ken lin bɔɔd zin'isia. Yɛlsʋm kennɛ din bɔɔd luosia ka yɛlbɛ'ɛd mɛ maan ala.

M YA'A DAA BAŊINƐ

Mɔdigire malis. Awinkudug anɛ onɛ bɔɔd zina-zina ye o di. Nwɛne kpaadibi ɛɛn bʋd ka mɔdig si'em gur ka bunib win nyaan paae la, on ɛɛn bɔɔd ye o bʋnnɛ saŋkane ka ba bʋt la. Ndɛraug mɛ anɛ mɔdigir sɔb. Hali o tun'e zi'e ka waaf sin'iŋe dʋ o nɔba ti keŋ paae o zupaasug. Fʋ ya'a kudin bɔɔd fʋn zaŋim piinm kuns o lʋgiri ti paae o nyɔɔdɛ o kpɛn anɛ mɔi. Kassa gbaagba! abɔnam nidi nwa?

Awinkʋdʋg nɛ Ndɛraug saam daa buoli ba ye, "M biisɛɛ kemi naa" ka ba kena zi'en ka o yɛli ba ye, M ya'a ti niŋ vɔn' daaasi'er yanam kpɛm bɛ baanlim nɛ taaba. Ka ba wʋsa siak ye, "ti wʋmya ti saam sʋŋɔɔ". Ba saam la daa mɔr pʋtɛn'ɛr ye o ya'a ti kpi, Awikudug onɛ an o dakɔnkpɛɛnm la na di o faar. Sɔ' wʋsa mɛ mi' ye bikpɛɛnm dit faar. Atɔ, ka yʋʋm piiga kena paas ka ba saam la yʋ'ʋn kʋdig ka o nini pʋ lɛn nyɛt ya'asɛ. Daar yinne zaam ka o buol Awinkudug n nya'am o yɛl ye, bɛog zaam ya'a ti paae anwana win m na duoe keŋe ya yaaname bɛ zin'isia la ka mɛ maal zin'ig sʋ'ʋŋa digili ya. Dinzugɔ m bɔɔd ye fʋ bɔ diib sʋ'ʋŋa kɛɛsim ka m nyaan tisif nɔsʋŋ. Zi ka biis la ma wʋmya ka niŋ tɔlibi yɛli Ndɛraug ye o bɔɔm diib sʋ'ʋŋa bɛog bɛkɛung karifa ayuobʋ saŋa ka ya'a ka' ala o bier la na di'e nɔsʋŋ la ba saam la san'an wʋsa.

Zakan la ba da gbɛnɛ kɔm ka ba wʋsa kɔm yʋ'ʋn zabid hali pamm amaa Awinkudug kɔm da zabidi gati ba wʋsa. Mɔdigir daan la daa su'a o maŋʋ kansa ka ba nan pʋ bi'ig sʋ'ʋŋa ka o mɔdigi diinn o kɔm la baanlim. Amaa kɔm daa ti nyaŋ Awinkudug ka o gʋ'ʋŋ ka niŋ sigib- sigibi keŋ o pitʋ la san'ane nya'am yɛl o ye, "kem yisi fʋ maŋʋ kansa la yinne ma'aa tisim ka m na kpi". Ka o pitʋ la yɛl o ye, "alaa tisim kpɛuŋ la ka di'e maŋʋ anu". Ba wʋsa daa sid siak ala. Ka bɛogʋ ti nie la ka Ndɛraug maal diib tɔ'ɔtɔ keŋ tis o saaam la ka o di ka tis o nɔsʋŋ, hali ka lɛn kaanb kaanb sʋŋʋ tis o. On kpɛn naae ka o yit la ka o bier la mɛ kpɛn'ɛdna. Ka o saam yɛl o ye o bibignɛ teŋ (bɔzugɔ o pitʋ la di'e gaad sa). On daa pʋ tun'e mɔdigɛ ka zaŋ o kpɛnmsir la tis ka di'e maŋʋ la kɛ ka o gʋ'ʋŋ nɔsʋŋ la di'er; bɔzugɔ kɔm la daa anɛ makkir. Awinkudug yʋ'ʋn daa yɛl ye, M YA'A DAA BAŊINƐ?.

FƲ NIŊ WALA KA TIGIR BƐ FƲ YINNƐ?

Abʋgʋr anɛ kpaad. O kuodi mui nɛ suma nɛ ki nɛ kawɛna ka lɛn gʋ'ʋn bʋnkɔnbid. Fʋ ya'a paae o yinnɛ nɔɔs mɛ anɛ sa'u. O zʋʋd ɛɛn du'anɛ gaad nidib pamm bʋn ka diib an wɛɛug o yin. Hali o dakɔɔnr dinɛ pu'asaan ka o yʋ'ʋr buon ye Akpɛlimbɔɔd. Nidib bɛdegʋ mɔɔdi ye ba tʋm zɛnmis nɛ o la'amnɛ wala ba pʋ nyaŋe nyɛt wʋʋ on nyɛt si'em la. Agɔtib anɛ o kpia ka keŋ o yin ye o viisi baŋ on ɛɛn niŋ si'em tʋmmi nyɛt la.

Agɔtib:                  Sɔnsiga Abʋgʋrɛɛ.

Abʋgʋr:                Yaʋʋ nɛ fʋ kenken.

Agɔtib:                  Fʋ duoe wala?

Abʋgʋr:                Laafi bɛ. Bɛogʋn kibarɛ?

Agɔtib:                  Li malis m zua sʋŋɔɔ, m bɔɔdnɛ ye fʋ wɛlisi bigisim fʋn ɛɛn niŋ si'em ka tʋmmi nyɛt la.      Baa li ya'a anɛ ti kʋ nɔɔs nɛ danwana, m na kʋ.

Abʋgʋr:                M zuaa, li pʋ tɔiya. Ka' m ditnɛ tiim bɛɛ m bʋgidnɛ ba'adɛ; li anɛ anwa giŋa. Man pʋ           da'ad na'asaabugulum, man ɛɛn vaae nɛ kɔnbid bugulum nɛ zampakin sa'apɔn'ɔsa basid              ka nyaan nwɛ' niigi. Line lɛm paas anɛ ye man pʋ nyɔ'ɔdi m pɔɔdɛ, m ɛɛn vaae sa'ad la nɛ          pin' ka li pun'e line kilim kʋ'ʋlim. M lɛn tunɛ tanbɔk yin la niŋid sa'ad ka li pun'od ka m            vaadi basidi m pɔɔd. M zua, fʋ ya'a niŋ nɛ' ka saa ni, ki ɛɛn kpɛn vaae nɛ an yu'a-yu'a.

Agɔtib:                  Zi'ilim anɛ pitɔɔg. Tinam ɛɛn vaali ti pɔɔd sa'ade nyu'oe nɛ. Tinam mi' ye fʋ mɔri tiim.         Anwa ka ba yɛt la woo, gɔsime, m ya'a pʋ bu'osinɛ m naan niŋin wala baŋinɛ? Tigir mɛ            na sigi m yin dʋnna.

YA'AM GƆNLƲŊ PIAN'AD

Karim sɔb bama ka gandig bu'osa bane dɔl la. Asɛɛ fʋ karim tutuaa ka ya'a ka'a alaa fʋ kʋ gban'ae li gbinɛ.

1.                            Ka ba kpɛn tansid ye, yɛlim ka duoe; yɛlim ka vʋ'ʋs. Ka sieba maan tʋkpiidʋg ka sieba       nwɛ'ɛd kɔsiŋkɔɔs ka kpikpɛlis lut zɛn'ɛzɛn' ka o kpɛn uunsid ka kaasid.

ƆN FƲT

BU'OSA:

1.                            Karʋŋ la pian'ad bɔ?

2.                            Nimbane la'as la an nimbɔnam buudi ma'aa nɛ?

3.                            Pian'akaŋa gbinɛ? "Ɔn fʋt"

2.     Pukur-pukur-pukur ka bas ka li kum sɛɛnn ka lɛn niŋ Pukur-pukur-pukur ka wabig daug la la'am nɛ lin tʋl la. Ka bas ka li niŋ bɔn'bɔn ka yʋ'ʋn niŋ kɔɔn-kɔɔnd-kɔɔnd.

BU'OSA

1.                            Karʋŋ la pian'ad bɔ?

2.                            Ka pian'abɔ bigisid kukuma?

3.                            Ka bɔname pʋ pian'ada?

3.     Saae-saae-saae ka fin'e yarr ka nyɔ'ɔs kpand ki'iki ka ba iank ba'am-ba'am-ba'am ka lɛbi lu ka ya'ae           ye sisi-sisi ka ba tʋbir zian'as hali ka lɛɛ pʋ pian'ada.

BU'OSA:

1.                            Karʋŋ la pa'an bɔ kʋsaalinɛ?

2.                            Pianbɔ bigisid ye ba zu'oya?

3.                            Ka bɔname pʋ pian'ada?

4.                            Saa-saa-saa ka bas ka li lu kpiŋilim ka lɛn tiak arakɔn' la ka li niŋ saaa ka la'am pʋ zɔt o       gɛɛnlisɛ.

BU'OSA:

1.                            Karʋŋ la pian'ad bɔ?

2.                            Ka bɔ lu kpiŋilim nɛ?

3.                            Ka bɔ mɛ lu saaa la?

5.                            Mud-mud-mud-mud, iann ka li niŋ fib-fib. Ka li kpɛm mɔr mud-mud-mud ka tans ye keei.                Ka lɛn tuligid mud-mud-mud iann ka ba kpɛn dig muula muula.

BU'OSA:

1.                            Karʋŋ la pian'ad bɔ?

2.                            Ka saŋkane win ka li tʋmma?

3.                            Pian'kaŋa gbinɛ? "okeei".

4.                            Ka bɔname dig muula muula?

5.                            Kpan' kpan' kpan' ka ʋk zug ka nya'am nya'am ka lɛn niŋ kpan' kpan' ka gi'e gɔbg nɛ tiuŋ ka lɛn niŋ kpan' kpan' ka nya'am nya'am ka wabig nindaa ka nyaan duoe.

BU'OSA:

1.                            Karʋŋ la pian'ad bɔ?

2.                            Kpan' kpan' la gbin an bɔ?

3.                            Ka nimbane niŋid kpan' kpan' la?

7.                            Ka ba kpɛn gɔsid kii ka yɛl ye anɔ'ɔne la? Li nwɛnɛ Awin ka sieba ye Akudug. Ɛɛn Awin.      Awin yee Awin, ka o kpɛn an duuu kenna ka ba tu'usid o.

BU'OSA:

1.                            Karʋŋ la gbinnɛ?

2.                            "Li nwɛnɛ Awin ka sieba ye Akudug. Awin yee Awin". Li tiendi ti bɔbʋnnɛ?

MALISIM PAAS MALISIM.

(ABƲƲG NƐ AKƆRA NƐ AGBIGIM YƐLA).

Abʋʋgʋ daa bɛ ka daar yinne ka o yɛl o pu'a ye, li yuugya ka m pʋ keŋ kaae m diemma, dinzugɔ, bɔɔm kpalʋg nɛ yaarim na ka m keŋ kaae ba. Ka o pu'a pʋ ki'isɛ ka bɔɔ tis o. Ka o isigi mɔr ken tat-tat-tati ti paae sian'kpɛuŋ teŋsʋk ka Akɔra zɔɔ kidig o ka bu'os o ye, " m zua, fʋ ziid bɔ?" ka Abʋʋg lɛbis ye, " m yuugi nɛ m diem ka wa'ae ye m gɔs o. Ka Akɔra lɛm bu'os o ye ka bɔɔ la ka fʋ ziid la? Ka Abʋʋg lɛbis ye li anɛ kpalʋg nɛ yaarim.  Ka Akɔra kpɛn la' ye Hahaa, nɛ' anɛ malisim paas malisim ka si'ir gban'ae o pamm sa ka o Ka o kpɛn la'a zɔɔ kpɛn' mɔɔgʋn ka lɛn zɔɔ yina bu'os Abʋʋg ye ,"fʋn sid ziid bɔ kimm nɛɛ?" Ka Abʋʋg sunf san'am bɔzugɔ, o pʋn mi' ye Akɔra na gban'ae o; ka lɛbis o ye m ziidnɛ kpalʋg nɛ yaarim . Ka Akɔra sunf kpɛm  ma'ae hali pamm ka o yɛl yɛl ye, " bi'esʋg kae, nɛ' sid anɛ malisim paas malisim" bɔzugɔ Abʋʋg ni'im sid malis ka o lɛn ziid kpalʋg nɛ yaarim. Akɔra lɛm maligin la' nɛ hali zɔɔ yʋ'ʋn keŋ di'ig gbigim tiig gbinnin ka yʋ'ʋn gʋ'ʋŋe zi'e bʋra wʋʋ saa bʋ' niiŋnɛ.

Ka Abʋʋg mɛ kpɛm buŋe paae ba san'ane bu'os ye bɔ maalɛ? Ka Agbigim ye o nyine mɔd hali ka li kʋlin ka' line yɛta. Ka Abʋʋg ye, "oi, mane mɔr nyin tiim amaa li nya'a anɛ tʋʋm. Ka Agbigim ye o pa'alim o ka o na iee li na. Ka Abʋʋg kpɛn yɛl o ye, "fʋ na nyɛ Akɔra ni'immɛɛ?. Ka Agbigim lɛbis ye ɛɛn. Ka Abʋʋg tʋm o kɔlʋgʋne suk kpalʋg nɛ yaarim la na, ka Agbigim bu'os Akɔra ye, fʋ pʋ wʋmnɛ bɛɛ? ka Akɔra yɛl o ye o mɔr sʋ'ʋraug na ka o gbin'e tis o. O di'e sʋ'ʋg la luk o ni'ime tis Agbigim ka Agbigim mɛ di'e tɔlisi tis Abʋʋg ka o di'e gbin'e kpalʋg nɛ yaarim nɔ'ɔŋe nɔ'ɔŋe tis Agbigim ka o di'e vɔl birid ka tans ye, "ta'ana" ka Akɔra lɛn niŋ ala tis Abʋʋg ka on mɛ gɛndigi tis Agbigim ka o niŋ birid ka lɛn tans ye ba ta'ana. Ka ba niŋ ala ya'as ka o lɛn tans ye ba ta'ana.

Akɔra niŋ yʋ'ʋn ti saaen tɔɔg ka o kpɛn niŋ bab-bab ka Agbigim mɛ kpɛn dɔl ka tansid ye, "ta'ana, ta'ana!" ka Abʋʋg kpɛn zɔ kul o yin. Din ka ba ye teŋ ya'a lalla, o tiraan mɛ bɛ tuon la.