Azaya Zut 13

Wina'am na tɛɛg Babilon tʋbir
1 Babilon labaar linɛ ka Wina'am da kɛ ka Amoz biig Azaya nyɛ la nwa':
2 Kʋkʋn zug zin'ikanɛ ka tiis nɛ mɔɔd kae la,
anina ka ba mɔɔn zaba labaar.
Ya kaasim agɔla tisi ba
ka ʋki ya nu'usi tiesi pa'ali ba
ka ba dɔl kpɛɛmnam za'anɔya la kpɛn' tempʋʋgin la.
3 Mam mɛŋ tis nimbanɛ ka m gaans la nɔɔr,
m la'asi m nidib la,
ba anɛ banɛ mi' zaba sʋ'ʋŋa:
ba na zab nɛ banɛ kɛ ka m sʋnf duoe la.
4 Kɛlisim tʋkpiidʋg kanɛ yit zuoya la zut na,
li nwɛnɛ nidibi la'as bɛdegʋ nɛ!
Kɛlisim tɛɛns la tʋkpiidʋg, buudi la la'asid taaba!
Zugsɔb la la'asid o zabzabidib ye ba nwɛ' tanp.
5 Ba yinɛ teŋ kanɛ lal,
zin'ikanɛ an dunia la bɛn la.
Zugsɔb la nɛ o nimbanɛ an wʋʋ o zaba la'ad la
na san'am dunia la wʋsa.
6 Kaasimi, ka Zugsɔb dabisir la li'el ya,
li na kena nwɛnɛ san'auŋ linɛ yit Paŋtita'ar Sɔb san'an na.
7 Nɛ'ɛŋa zug, sɔ' wʋsa nu'us kʋ lɛm mɔr paŋa
ka ba ya'am na bɔdig.
8 Dabiem na kpɛn' ba,
ka tɔɔg nɛ sʋnsa'aŋ tita'ar na paae ba,
ka li zabir na nwɛnɛ pu'a na sa'ae nɛ,

ka ba nini mu'oe wii ka ba yirid.

9 Gɔsima, Zugsɔb dabisir kenna.
Li anɛ dabisbɛ'og,
ka anɛ o sʋnpɛɛn linɛ mɔr dabiem la dabisir.
Li na kɛ ka tʋʋmbɛ'ɛd dim san'am
ka teŋ la lieb dabɔɔd.
10 † Nwadbibis banɛ bɛ saŋgbauŋin la wʋsa kʋ lɛn nie.
Winnig na lieb lik,
ka nwadig mɛ kʋ lɛn tans na ya'asɛ.
11 M na namis dunia nidibi ba tʋʋmbɛ'ɛd la yɛla,
nɛ banɛ an bugusim dim la ba bugusim la yɛla.
M na gu'oe nyɛɛsim dim nɛ ba nyɔ'ɔg nwɛ'ɛb la,
ka sie banɛ dʋ'ʋsidi ba mɛŋ ka ziemi ba taaba la.
12 M na kɛ ka nidib kpɛlim bi'ela
ka kar hali gaad sanlim vɛnla,
hali ba na kari gaad Ofir sanlima.
13 Man Zugsɔb onɛ an Paŋtita'ar Sɔb la sʋnf ya'a ti pɛlig,
saŋgbana na dammid,
ka teŋ na mi'im lin bɛ zin'isi'a la,
daa kanɛ ka m sʋnf la'aŋi nwɛnɛ bugum la.
14 Sɔ' wʋsa na zɔɔ lɛb o nidibin,
ka widigi kuli ba mɛŋ teŋin.
Ba na nwɛnɛ walis ka tɔn'ɔsnam budigi ba,
bɛɛ pɛbanɛ pʋ mɔr kɔnbkemma.
15 Onɛ wʋsa ka ba gban'e o ba na kʋns o,
ka na nɔki ba zaba sʋ'ʋsi kʋʋ ba wʋsa.
16 Ba na fanbi ba bilies teŋin kʋʋ ba, ba nini ni;
ka kpɛn' ba yaanɛ fan' la'ad ka bibi ba pu'ab.
17 Gɔsima, m na kɛ ka Media dim kena
ka ba sʋʋnr duoe ka ba zab nɛ ba.
Ba ba'a ka' nɛ anzurifaa,
ka ba ya'amlɛog mɛ pʋ bɛ nɛ sanlimaa.
18 Ba tiraad la na tɔn na'akim;
ba kʋ zɔt bilies nimbaanliga
bɛɛ ba gɔs biis ka nimbaanlig mɔri ba.

19 † Babilon sʋ'ʋlim la da vɛnli gaad sʋ'ʋlim wʋsa,

lin ka ba mɔri dʋ'ʋsidi ba mɛŋ la.
Nɛ nɛ'ɛnam wʋsa, Wina'am na san'ami li
ka li na an wʋʋ on da san'am Sodom nɛ Gomora si'em la.
20 Nid kʋ lɛn zin'in anina
zʋmaʋŋ kaŋa hali nɛ zʋmaana banɛ dɔl nya'aŋ na la wʋsa.
Arab dim la kʋ lɛn ti' ba sʋga anina,
ka sɔ' mɛ kʋ lɛn kem kɔnbid anina.
21 Pipirisin bʋnkɔnbid na dig anina,
ka zunna na pɛ'ɛli ba yaan la.
Viid na maali ba tɛɛd anina
ka sian'arin bʋʋs na ian'ad anina di'em.
22 Zaŋku'a na kaasidi ba kpi'euŋ zin'ig la,
ka wɛbaas na digi ba vʋ'ʋsʋm zin'isin la.
Babilon saŋa paae ya,
o dabisa pʋ lɛn lal la.