Azaya Zut 10

1 Tɔɔg na paae banɛ zi'en wada linɛ pʋ dɔl suorɛ,
nɛ banɛ tisid nɔzi'elʋg linɛ mugusid nidib,
2 ka mɔŋid nɔŋ dim linɛ aan ba din,
ka pʋ tisidi m nimbanɛ ka ba mugusid la bʋʋdɛ.
Ba faand pʋkɔnya la'ad
ka dit kpiibis faar yɔɔg-yɔɔg.
3 Ya na ti niŋ wala sam yɔɔb daarɛ,
ka yɛltɔɔd ya'a ti yi lalli paae ya na,
ya na keŋ anɔ'ɔn san'an ka o faaɛn ya?
Ya na nɔki ya kpan'am la niŋ yaanɛ?
4 Ya kʋ nyɛ su'ab zin'iga
amaa ya na zɔɔ la'as nɛ banɛ ka ba gban'e ba la
hali ka ba kʋʋ ya paas banɛ kpi la zug.
La'an nɛ wala, o sʋnpɛɛn la kʋ tɔɔm ka basi yaa,
li na kpɛm bɛɛ ya zugin.
Wina'am na kad Asiria saria
5 “Tɔɔg na paae Asiria!
Mam daa nɔk o ye o an wʋʋ m balaar,
linɛ ka m na mɔri bʋ'ʋdi ya m sʋnpɛɛn zug la.
O nu'ugin ka m sʋnpɛɛn duor la bɛ!
6 M da tʋm o ye o keŋ zab nɛ m nimbanɛ zi' Wina'am la.
M da kɛ ka o keŋ zab nɛ m nimbanɛ pɛligidi m sʋnf la,
ye o gban'e ba ka faaɛn ba la'ad,
ka nɔɔ ba wʋʋ bian'ar ka ba nɔɔd suorin si'em la.
7 Amaa on pʋ gban'e ala o pʋtɛn'ɛrinɛ,
o gban'e nɛ ye o san'am ka li' buudi bɛdegʋ.
8 O nwɛ'ɛd nyɔ'ɔgi yɛt ye, ‘Man tuongatib la wʋsa ka'anɛ na'anamaa?
M pʋ san'am Kalno teŋ nɛ Kakimis teŋ la wʋsaa?
9 M mɛ san'am Hamat nɛ Apad tɛɛns la wʋsa,
hali la'am pɛ'ɛs nɛ Samaria nɛ Damaskus tɛɛns la.
10 Man sadigim zabi nyaŋ buudbanɛ maan bada la,
buudbanɛ ka ba bada zu'oe gaad Jerusalem nɛ Samaria din la,
11 m kʋ san'am Jerusalem dim nɛ ba bada la
wʋʋ man da niŋ Samaria dim nɛ ba bada si'em laa?’”
12 Amaa Zugsɔb la yɛl ye, “M ya'a ti naae man tʋm si'el Zion nɛ Jerusalem la, m na namis Asiria na'ab la o dʋ'ʋsim mɛŋ nɛ o nyɛɛsim la yɛla. 13 O yɛl ye,

‘Mam mɛŋ paŋ ka m tʋmi li nɛ m nu'ug

nɛ m mɛŋ ya'am, bɔzugɔ m gban'ad si'el wʋsa gbin.
M yis sʋ'ʋlim wʋsa titɔndis ka faaɛn ba areza'as.
Man an gandaug la zug m nyaŋi ba wʋsa.
14 M nu'ug faaɛn buudi bɛdegʋ kpan'am,
nwɛnɛ nidi ba'aŋi yak niis tɛɛd
ka vaae gɛla bɛdegʋ nɛ.
Ala ka m la'as tɛɛns la wʋsa,
ka sɔ' pʋ nyaŋi dam o kpʋkpauŋ
bɛɛ ya'ae o nɔɔri yɛl si'ela.’
15 Abaa! Lieŋ na nyaŋi ʋki li mɛŋi gaad onɛ ʋki li laa?
Bɛɛ sʋ'ʋg dʋ'ʋsi li mɛŋi gaad onɛ mɔri li tʋmid laa?
Dau ʋkid duor
ka duor pʋ ʋkid dau!
16 Dinzug, Zugsɔb onɛ an Paŋtita'ar Sɔb la na nwɛ' Asiria na'ab la,
ka kɛ ka wiim kpɛn' o zabzabkpi'ema la niŋgbina ni,
ka bugum pielim na dit o na'am girima la'ad la wʋsa.

17 Mam Wina'am onɛ an Israel nɛɛsim la na lieb bugum,

mam onɛ an kasi la na lieb bugum pielim
ka di si'el wʋsa
la'am kanb o gɛnda nɛ gauŋ la wʋsa.
18 O sian'anr linɛ vɛnl hali ka ma'ae siaa,
nɛ o pɔɔd banɛ mɔr kʋ'ʋlʋm hali la.
Ba wʋsa na san'am nyain
wʋʋ ban'a bɛ'ɛdi na kpɛn gban'e nidi san'am o si'em la.
19 Tiis banɛ na kpɛlim o sian'arin la na pɔɔd
hali ka biig na nyaŋi kaali ba ka sɔb.”
Israel dim banɛ kpɛlim la yɛla

20 Saŋkan la ya'a ti paae, Israel dim banɛ kpɛlim la, Jakob yidim banɛ nan vʋe la kʋ lɛn nɔki ba ti'iri niŋ onɛ bʋ'ʋdi ba la nii, amaa ba na ti'enɛ Zugsɔb onɛ an Israel dim Wina'am Onɛ An Kasi la. 21 Banɛ pɔns la na lɛb na, Jakob nimbanɛ kpɛlim bi'ela la sid na lɛb Wina'am Onɛ an Paŋtita'ar sɔb la san'an na.

22 † La'an nɛ Israel dimi zu'oe wʋʋ titanbin'isʋg linɛ dig atɛuk nɔɔrin la, ba bi'ela ma'aa na lɛb na. O gban'e ba san'auŋ yɛla, o na san'ami ba wʋsa wʋʋ lin nar si'em. 23 Zugsɔb onɛ an Paŋtita'ar Sɔb la na kɛ ka gban'ar linɛ an san'auŋ la yɛla lu teŋ la wʋsa zug.
24 Dinzugɔ, Zugsɔb onɛ an Paŋtita'ar Sɔb la yɛl ye, “M nimbanɛ bɛ Zion teŋinɛ, da zɔti Asiria dim dabiem, hali nɛ ban mɔr duoya nɛ balaya bʋ'ʋdi ya wʋʋ Egipt dimi da niŋidi ya si'em la. 25 Li kʋ yuugɛ ka m sʋnpɛɛn la naae ani ka fɛndigi lɛb banɛ bɔɔdi ya san'auŋ la san'an.” 26 Zugsɔb onɛ an Paŋtita'ar Sɔb la na fiebi ba nɛ sisanbig wʋʋ on da fieb Midia dim Oreb Tampiingin si'em la, ka na  o dansaari kpa' Atɛuk ku'om la wʋʋ on da niŋ Egipt si'em la.
27 Saŋkan la ba na yis ziid la ya zugin,
ka yisi ba yu'asindaug la ya ningɔnya ni,
yanamɛ na nɔb la zug, yu'asindaug la na kɔ'.
Asiria dim Kenna ye ba zab

28 Asiria dim kpɛn' Ayaf teŋin gaadi keŋ Migron,

ka su'a ba la'ad Mikmas teŋin.
29 Ba dɔl za'anɔɔrin la gaad ka yɛl ye,
“Ti na la'as Geba teŋin yʋ'ʋŋa.”
Ka dabiem kpɛn' Rama dim ka ba kirid,
ka Gibea linɛ an Saul teŋ la dim zɔt.
30 Gallim dima, ya tansim agɔla!
Laisa dima, kɛlisimi!
Lɛbisimi, Anatof dima!
31 Madmena dim bɛ nɛ zɔɔgin,
ka Gebim dim ieed suak zin'ig.
32 Asiria dim na zi'en Nob teŋin zina,
Zion Zuorin la ba na nwɛ'ɛd nu'usi pisid,
hali nɛ Jerusalem kʋkʋnin la.
33 Gɔsim Zugsɔb la, Zugsɔb Paŋtita'ar Sɔb la,
o na nwaae wila la bas nɛ o paŋ tita'ar la.
Ba na nwa' tibɛda la wʋsa bas,
banɛ wa'am hali la na li teŋin na.
34 O na nwaae tititada banɛ bɛ sian'arin la nɛ lieŋ,
Lebanon tiis na li Paŋtita'ar Sɔb la tuon.