Azaya 42

Zugsɔb tʋmtʋm la yɛla

1 † “Gɔsima, oŋa aan m tʋmtʋm onɛ ka m tis o kpi'euŋ,

on ka m gaŋ ka m sʋnf malis o yɛla.
M na kɛ ka m siig la pɛ'ɛl o,
ka o na mɔr yɛlsida kɛn buudi wʋsa ni na.
2 O kʋ tansid agɔla gɔla,
bɛɛ dʋ'ʋsid o kʋkɔri pian'ad suoraadinɛ.
3 Mɔkanɛ bɔɔd kɔ'ɔgir la, o kʋ kɔ'ɔgi li naae.
Lauŋʋ kanɛ pʋ dit sʋ'ʋŋa, o kʋ kpiisi lii.

O pʋpielim la zug, o na kɛ ka sida zi'en.

4 O giinla kʋ siɛn ka o tadig ka basɛ,
hali nɛ on na ti kɛ ka yɛlsida la tiig dunia wʋsa.
Ala ka buudi wʋsa na mɔr ti'ir o yʋ'ʋrin.”
5 Nɛ'ɛŋa an linɛ ka Zugsɔb Wina'am la yɛt;
on kanɛ maal saŋgbauŋ ka yadigi li wʋʋ sɔŋ la.
Onɛ yadig teŋgbauŋ la nɛ bʋn dinɛ yiti li zugin la,
onɛ tisid o nidib pɛbisim ka ba vʋ'ʋsid,
ka tisid banɛ bɛ dunia wʋsa nyɔvʋr; o yɛt ye,
6 “Mam onɛ an Zugsɔb la buolif nɛ, nɛ pʋpielim;
M na gban'e fʋ nu'ug,
m na maali fʋ zi'el sappi
ka kɛ ka fʋ an nɔnaari tis nidib la
ka an nɛɛsim tis banɛ ka' Juda dim la.
7 Fʋ na lak banɛ zu'om la nini,
ka yɔ'ɔg banɛ bɛ sanrega ni la ka ba nyɛ yɔlisim
ka yis banɛ bɛ likin la na.
8 Manɛ an Zugsɔb la; m yʋ'ʋri la!
M kʋ nɔki m girima pʋdig nɛ sɔ'
bɛɛ nɔk linɛ an m yʋ'ʋr zʋn'or la tis ba'arɛ.
9 Gɔsima, bʋnkʋda la gaad ya,
ka m mɔr bʋmpaala na;
saŋkanɛ ka ba nam pʋ yina la
ka m mɔɔnnɛ tisidi ya.”
Zugsɔb la zʋn'or yʋʋma
10 Yʋ'ʋmmi yʋʋm paalli tis Zugsɔb la
teŋgbauŋ wʋsa zun'om o,
yanam banɛ bɛɛ atɛukʋn la nɛ linɛ bɛɛ ani wʋsa;
yanam banɛ ka ku'om giligi ya tɛɛns la
nɛ linɛ bɛɛ ani wʋsa.
11 Kɛl ka pipiris nɛ ba tɛɛns la wʋsa dʋ'ʋsi ba kʋkɔya;

kɛl ka banɛ zin'in Kedar maal sumalisim.

Kɛl ka nimbanɛ bɛ Sela teŋin la yʋ'ʋm nɛ sumalisim;
kɛl ka ba tansid zuoya la zug.
12 Kɛl ka ba tis Zugsɔb la girima
ka mɔɔli dʋ'ʋs o yʋ'ʋr tɛɛns banɛ lal la wʋsa ni.
13 Zugsɔb la na yina wʋʋ zabzabkpi'euŋ nɛ,
ka ti'ebid nɛ nimmua
tansid agɔla gɔla nwɛ'ɛd zaba kuŋ
ka na nyaŋ o dataas la wʋsa.
14 Ka ye, “Li yuug ya hali ka m an baanlimm,
m anɛ baanlimm ka gban'e m mɛŋi lɛb nya'aŋ.
Amaa nannanna, m nwɛnɛ pu'a kanɛ bɔɔd biig du'ab,
m kaasid agɔla kirid ka vʋ'ʋsidi pʋ paada.
15 M na san'am zuoya nɛ kʋkʋna la wʋsa
ka kɛ ka ba tiis nɛ mɔɔd wʋsa kʋdig;
M na kɛ ka kɔldaad la lieb pipiris
ka kɛ ka bɛɛnna la kʋdig.
16 M na mɔr zʋnzɔɔs la dɔlis suokanɛ ka ba zi',
suobanɛ ka ba pʋ miilim la m na dɔlisi ba;
M na kɛ ka lik linɛ bɛɛ ba tuon la lieb nɛɛsim
ka kɛ ka suobanɛ ka' sʋm la lieb sassi.
Nɛ'ɛnam ka m ye m tʋm;
M kʋ tami ba yɛlaa.
17 Amaa banɛ niŋ bada yadda,
ka nɔk linɛ ka ba maal la yɛl ye, ‘Ya anɛ ti wina la,’
ba na di nyan tita'ar.”
Israel dim anɛ tʋbkpida nɛ zʋnzɔɔs
18 “Wʋmmi, yanam banɛ an tʋbkpida la;
Gɔsimi, yanam banɛ an zʋnzɔɔs la, ka nyɛ!
19 Anɔ'ɔnɛ an zʋnzɔŋʋ gaad man tʋmtʋm la,
ka an tʋbkpida nwɛnɛ onɛ ka m tʋm la?
Anɔ'ɔnɛ zu'om nwɛnɛ onɛ pɛsig o mɛŋi tis man la,
ka nwɛnɛ Zugsɔb tʋmtʋm la ka pʋ nyɛta?
20 Fʋ nyɛ si'elnam bɛdegʋ amaa fʋ pʋ kɛligɛ;
fʋ tʋba yɔ'ɔg ya, amaa fʋ pʋ wʋm si'ela.”
21 Li malis Zugsɔb la o pʋpielim la zug
o na kɛ ka o wada la kpi'em ka mɔr girima.
22 Amaa nidib nwa' anɛ banɛ ka ba fan' ka zuu ba,
ba ludi ba wʋsa nɛ bʋmbu'adin
bɛɛ kpɛn'ɛsi ba sanrega ni
ka sɔ' kae na faaɛn baa;
sɔ' mɛ kae na yɛl ye, “Lɛbisimini baa.”
23 Yanamɛ bɛ la anɔ'ɔnɛ na kɛlis nɛ'
bɛɛ gban'e o mɛŋi gur saŋa kanɛ na ti kena?
24 Anɔ'ɔnɛ nɔk Jakob n tis ka ba faand o,
ka kɛ ka Israel an onɛ ka ba faanda?

Li ka'anɛ Zugsɔb

onɛ ka ti tʋm o taal laa?
Ban pʋ dɔlisid o suoya
ka pʋ siak o wada la zug.
25 Ala ka o kpa'ae o sʋnpɛɛn
linɛ an zabbɛ'og la yɛɛli ba,
ka li diti ba wʋʋ bugum pielim nɛ,

la'an nɛ wala ba pʋ gban'e li gbinnɛ.

Li kanbidi ba, amaa ka ba la'am pʋ su'unida.