Atiigah Moses

AZAYA ZUT 2

Zugsɔb zuor la yɛla 
( Mai 4:1-3) 

1 Amoz biig Azaya da nyɛ si'eli zaŋi keŋ Juda teŋgbauŋ nɛ Jerusalem tempʋʋg yɛla la nwa':

2 “Naar saŋa la, 
zuokanɛ ka Zugsɔb Yir zi'e li zug la na zi'en kiŋ-kiŋ. 
Li na wa'am hali gaad kʋkʋna la wʋsa. 
Ka tɛɛns wʋsa nidib na la'as anina pʋ'ʋs. 

3 Nidib bɛdegʋ na la'as taaba yɛl ye,

‘Kemi na ka ti keŋ Zugsɔb zuorin la, 
kem na ka ti keŋ Jakob Wina'am Yin la. 
O na pa'ali ti o suori an si'em 
ka ti na dɔlli li sʋ'ʋŋa.’ 
Wina'am wada na yit Zion zuorin, 
ka Zugsɔb la nɔzi'elʋg na naan Jerusalem teŋin na ka ti siaki li. 
4 O na an tɛɛns wʋsa sariakat 
ka na maal buudi wʋsa pian'adi tisi ba. 
Ba na zan' ba zaba sʋ'ʋsi maal kʋnya, 
ka nɔki ba kpana la maal gɔn'ɔd. 
Ba kʋ lɛn tʋ'ʋsid tanp 
bɛɛ ba zamisid zaba ya'asɛ. 
5 † Jakob yidima, kemi na! 
Kɛlli ka ti keŋ Zugsɔb nɛɛsim la ni.” 
Zugsɔb dabisir la yɛla 
6 Nɔdi'es Azaya n da lɛn yɛl si'eli nwa': 
“Zugsɔba, fʋ basi fʋ nimbanɛ an Jakob yidim la. 
Ba dɔlnɛ ya-nya'aŋ dim buudi malima la wʋsa,
ba bʋgʋdnɛ wʋʋ Filistia dimi bʋgʋd si'em la, 
ka maan zuod nɛ nimbanɛ zi' fʋn Wina'am. 
7 Anzurifa nɛ sanlima pɛ'ɛli ba teŋin la; 
ba kpan'am la pʋ mɔr bɛnnɛ. 
Ba teŋ la pɛ'ɛli nɛ widi 
ka ba tɛrekonam pʋ mɔr bɛnnɛ. 
8 Ba teŋ la pɛ'ɛl nɛ bada, 
ka ba iginidi wɔ'ɔgid linɛ ka ba mɛŋ maal 
ka mɔr girima tisidi ba nu'usi maal si'el. 
9 Alazug sigisimi ba wʋsa teŋin ka kɛ ka ba di nyan. 
Da kɛɛ ba taali basɛ. 
10 † Kem kpɛn' tampinlɛma ni 
ka tu bʋmbu'ad teŋinɛ su'a ya mɛŋ 
Zugsɔb sʋnpɛɛn la nɛ o na'am paŋ la zug. 
11 Dau kanɛ an tita'alim sɔb la nini na ma'ae, 
ka saalib nyɛɛsim na sie, 
Zugsɔb la ma'aa ka ba na dʋ'ʋs o daakan la. 
12 Zugsɔb onɛ an Paŋtita'ar Sɔb la zi'el dabisiri 
gur banɛ mɔr nyɛɛsim ka dʋ'ʋsidi ba mɛŋ la. 
Ninkanɛ wʋsa nwɛ'ɛd o nyɔ'ɔg la na sig teŋin. 
13 O na san'am Lebanon na'aziinr tibanɛ wa'am la 
nɛ tititada banɛ bɛ Basan ka dʋ'ʋsidi ba mɛŋ la, 
14 nɛ zuotitada wʋsa 
nɛ kʋkʋna banɛ wa'am la, 
15 nɛ girimbisanam banɛ kpi'em la wʋsa, 
nɛ suak dɔtitada banɛ zaŋguoma wa'am la, 
16 nɛ anrima banɛ ka ba mɔri ken lallisa kpiisid, 
nɛ anrinvɛnla la wʋsa. 
17 Dau kanɛ an tita'alim sɔb la nini na ma'ae, 
ka saalib nyɛɛsim na sie. 
Zugsɔb la ma'aa ka ba na dʋ'ʋs o daakan la, 

18 ka bada la wʋsa na bɔdig nyain.

19 Nidib na zɔɔ keŋ kpɛn' tampinlɛma ni 
ka tu bʋmbu'ad teŋinɛ su'a ba mɛŋ, 
Zugsɔb sʋnpɛɛn la nɛ o na'am paŋ la zug, 
saŋkan ka o na duoe dam teŋgbauŋ la. 

20 Daakan la, nidib na nɔki ba anzurifa bada

nɛ ba sanlima wina banɛ ka ba maali pʋ'ʋsid la 
lɔbi tis dayuud nɛ zinzana la. 
21 Ba na zɔɔ kpɛn' tampinlɛma ni 
nɛ tampinyɔ'ɔdin ye ba su'a ba mɛŋ, 
Zugsɔb sʋnpɛɛn la nɛ o na'am paŋ la zug, 
saŋkan ka o na duoe dam teŋgbauŋ la. 
22 Da lɛn nɔki fʋ ti'iri niŋ ninsaal 
onɛ vʋ'ʋsʋm pʋ lal ka bɛɛ o nyɔnya ni la. 
O ka' vɔɔnr hali baa bi'elaa.”