Africa yɛla
Africa anɛ continent kanɛ ka fʋ ya'a yis Asia, continent kanɛ yalim ka lɛ an dinɛ ka nidib mi' di yɛla bɛdigʋ. Dunia la wʋsa anɛ 30.3 million km2 ku'om la wʋsa ya'a pɛ'ɛs, Africa mɔri 20% teŋgbaʋŋ la wʋsa pʋʋgʋn. Africa mɔr nidib 1.4 billion[1] 2021 yʋʋg banɛ da maal nidib kanlʋg la, ka an 18% dunia nidib wʋsa pʋʋgʋn. Amaa, Africa nidibi pɔɔd fʋ ya'a zaŋi mak bama la wʋsa ni[2]; 2012 yʋʋm saŋa la, nidib buudi banɛ da zʋ'oe Africa continent la da anɛ banɛ an yʋma 19.7 ka dunia la nidib buudi banɛ mɛn da zu'oe da an banɛ yʋma an 30.4. La'anɛ Africa mɔr Wina'am piinɛ dinɛ an sanlima, yaarim, ku'om, anzulifa nɛ bɛdigʋ sa la, Africa anɛ continent kanɛ mɔr ka'alim ligidi pʋʋgʋn ka lɛm bɛ nya'aŋ ka naan tis Ocenia continent la kpan'am pʋʋgʋn. Gbanmin'idib sieba yɛl ye dinɛ kɛ ka Africa bɛ nya'aŋ la anɛ nɛnnim, ninsabilisi da bɛ ya'amʋg ni la, tanb nɛ taaba yɛla[3], nɔɔr yinne ka'alim, filim-filim[4] nɛ bɛdigʋ sa. La'anɛ Africa nini pʋ mu'oe nɛ kpan'am yɛla la, tɛŋ la 'economy' zamisʋg la yʋ'ʋn du'oe nanna , ka ninpaalis yʋ'ʋn maal Africa ka di an tɔlʋŋ zin'ig kanɛ yalim.