Azaya zut 9

Ba du'a biigi tisi ti
1 † La'an nɛ wala, banɛ zɔt dabiem ka ba sʋnya da san'am la kʋ mɔr sʋnsa'aŋ ya'asɛ. Yʋma banɛ da gaad la o da sie Zebulun nɛ Naftali tɛɛns, amaa saŋa kenna ka o na na'as Galile linɛ an teŋ zʋŋ dim sʋ'ʋlim din zaŋ Atɛuk Suoraug la baba nɛ Joodan gbɛogʋ mɔri ken la.
2 Nimbanɛ ken likin la,
yʋ'ʋn nyɛ nɛɛsim tita'ar.
Nɛɛsim la nie tis nimbanɛ bɛ teŋ kanɛ an lik ka nwɛnɛ kum teŋ la ni.
3 Fʋ yaligi ba teŋ la ka pɛ'ɛsi ba sumalisim,
ka ba maan sumalisim fʋ tuon
wʋʋ nidibi na bun ki ka maan sumalisim si'em
bɛɛ nidibi na zabi fan' la'adi pʋdigid ka maan sumalisim si'em la.
4 Li nwɛnɛ dabiskanɛ ka Wina'am da nyaŋ Midian dimi tisi ya la.
O san'am yu'asin dakanɛ ka ba ziili ya la,
ka kɔ'ɔg dakanɛ ka ba nɔki bʋ'ʋdi ya la
nɛ kpa'asa banɛ ka ba da mɔri fiebidi ya la.
5 Ta'ada banɛ ka zabzabidib pidi keŋ zaba ni la
nɛ fubanɛ ka ba zaŋi bilim ziimin la,
ba na nyu'oe li nɛ bugum.
6 † Ba du'a biigi tisi ti,
ba tisi ti biribiŋ,
onɛ na sʋ'oe ti na'am sʋ'ʋlim.
Ba na buon o ye,
Onɛ Sa'an Nɛ Nyalima,
Wina'am Onɛ an Paŋ Sɔb,
Ti Ba' onɛ Bɛ Saŋa Wʋsa,
Sumalisim na'abiig.
7 O na'am la na nɔbigid nɛ sumbʋgʋsʋm si'em la kʋ mɔr bɛnnɛ.
O na zin'in Na'ab David na'am gbauŋ la zug,
ka zi'el na'am la sʋ'ʋŋa ka kɛ ka li mɔr paŋ.
O na tʋm nɛ sida nɛ pʋpielim,
lin yi saŋkan la nɛ saŋa linɛ ka' bɛnnɛ.
Zugsɔb onɛ an Paŋtita'ar Sɔb la na tʋm lina wʋsa nɛ nimmua.
Wina'am na tɛɛg Israel dim la tʋbir
8 Zugsɔb la tis labaar linɛ pɔ'ɔg Jakob yaas la,
li na lu nɛ Israel dim zugin!
9 Nidib wʋsa na baŋi li yɛla.
Amaa Efiram nɛ Samaria dim pian'adi dʋ'ʋsidi ba mɛŋ
ka mɔr nyɛɛsim ba sʋnya ni.
Ba yɛt ye,
10 “Tampiga mɛɛb la li ya, amaa ti na lɛbisi mɛ' nɛ kuga,
ba pilig kekaŋ daad yu'ada la amaa ti na lɛbis na'aziinri yu'a.”
11 Amaa Zugsɔb la kpɛ'ɛŋ Na'ab Rezin dataas la,
ka kɛ ka ba bi'emnam la sʋnya nyidig.
12 Aram dim la bɛ nɛ ya-nya'aŋ
ka Filistia dim mɛ bɛ ya-tuona.
Ba ya'ae nɔɔri bɔɔd ye ba vɔl Israel dim.
La'an nɛ wala, o sʋnpɛɛn la kʋ tɔɔm ka basi yaa,
li nan kpɛm bɛ nɛ ya zugin.
13 Amaa nidib la pʋ lɛb onɛ namisi ba la san'an na,
bɛɛ ba iee Zugsɔb Paŋtita'ar Sɔb la kɛɛn o san'an naa.
14 Alazug Zugsɔb la na tɛk Israel kpɛɛmnam
nɛ ba tadimnam la wʋsa tʋba,
ka na fi'ig Israel zug nɛ zʋʋr wʋsa daar yinne.
15 Ba kpɛɛmnam nɛ ninkpi'ema la an zut la
ka nɔdi'esidib banɛ pa'an linɛ ka' sida la an zʋya la.
16 Banɛ pa'an nimbama la mɔri ba nɛ kpɛn'ɛd mɔɔg,

ka ban pa'an sieba la bɔdig wʋsa.

17 Dinzug, Zugsɔb la kʋ zɔɔ ba na'akim,
bɛɛ ba kpiibis nɛ pʋkɔnya la nimbaanliga.
Bɔzugɔ, sɔ' wʋsa zan'as nɛ ka mɔr bugusim,
ka ba nɔɔr pian'ad anɛ bɛ'ɛd.
La'an nɛ wala, o sʋnpɛɛn la kʋ tɔɔm ka basi yaa,
li nan kpɛm bɛɛ ya zugin.
18 Sida, bugusim ditnɛ nwɛnɛ bugum nɛ,
ka dit gɛnda nɛ gauŋ wʋsa.
Li la'aŋ nɛ sian'atita'ari dit,
ka nyɔ'ɔs la gbilimme dʋt agɔla.
19 Zugsɔb onɛ an Paŋtita'ar Sɔb la sʋnpɛɛn duonɛ
ka o na kɛ ka teŋ kanb ka nidib wʋsa la'aŋ bugum,
saŋkan la, sɔ' kʋ siaki faaɛn o bier bɛɛ o pitʋ.
20 Ba na dit diib gɔbʋg nɛ diiug wʋsa
amaa ka kʋ tigɛ;
ka kɔ'ɔm kpɛn mɔri ba la zug,
ba na kʋʋ ba mɛŋ biisi ɔnb.
21 Manase nɛ Efiram dim na zabid nɛ taaba,
ka yʋ'ʋn la'asi zab nɛ Juda dim la.
La'an nɛ wala, o sʋnpɛɛn la kʋ tɔɔm ka basi yaa,
li nan kpɛm bɛɛ ya zugin.