AZAYA 61

Yʋʋm kanɛ an Zugsɔb faangir la
1 † Zugsɔb onɛ an Paŋtita'ar Sɔb la Siig bɛɛ m ni,
bɔzugɔ o gaŋim ye m mɔɔl labasʋŋ la tis nɔŋ dim.
O tʋmim ye m bʋgʋl banɛ sʋnya san'am la,
ka mɔɔl yɔlisim yɛla tis banɛ an yammis la,
ka yis banɛ bɛ sanrega la likin.
2 Ka mɔɔl yʋʋm kanɛ ka Zugsɔb na zɔ nidib nimbaanlig ka di'e ba
nɛ daakanɛ aan ti Wina'am la sam yɔɔb la.
O na bɛlis banɛ kum la,
3 ka tis banɛ bɛ Zion ka mɔr sʋnsa'aŋ la
na'am zupibig linɛ vɛnl ka pa'an sumalisim
ka ka' sʋnsa'aŋa,
ka tis linɛ na bʋgʋli ba sʋʋnr wʋʋ kpaam
ka ka' kʋkumaa,
ka yɛɛli ba fuug linɛ na dʋ'ʋsi ba
ka ka' sʋntɔɔgɔ.
Ba na buonnɛ ba ye pʋpielim tiis,
linɛ ka Zugsɔb la sɛ
ye li pa'al o vɛnlim.

4 Ba na lɛbi mɛ' dabɔkʋda la

ka lɛbisi maal zin'ibanɛ ka ba san'am ka li yuug la;
ba na lɛbisi mɛ' tempʋbanɛ an dabɔɔd
ka ba da san'ami li zʋmaana bɛdegʋ banɛ gaad la saŋa.
5 Teŋ zʋŋ dim na kemi ya kɔnbidi tisi ya;
saam mɛ na tʋmmi ya pɔɔdin nɛ tiwala lɔmbɔn'ɔdin.
6 Ba na buonnɛ ya Zugsɔb la maanmaannib,
ka pʋd o ya yʋ'ʋr ye ti Wina'am la tʋmtʋmnib.
Tɛɛns na mɔri ba kpan'am na tisi ya
ka ya na nwɛ'ɛd nyɔ'ɔg lin aan ya din la zug.
7 Lin naan aan nɛ'ɛsʋg la
m nidib la na di'e pʋʋr zin'is ayi',
ban naan diisinɛ ba nyan la
ba na maal sumalisim lin aan ba faar la zug;
ala ka ba na sʋ'oe faar la pʋʋr ayi' ba teŋin la,
ka sumalisim linɛ ka' naar na aan ba din.
8 Man Zugsɔb la nɔŋ sida la zug;
m kis faaung nɛ tʋʋmbɛ'ɛd.
M na yɔɔ ba nɛ m sida
ka maal nɔnaar linɛ ka' bɛn nɛ ba.
9 Tɛɛns la wʋsa na baŋi ba biis
ka nidib wʋsa baŋi ba yaas.
Banɛ wʋsa nyɛ ba na baŋ ye
ba anɛ nimbanɛ ka Zugsɔb la niŋi ba bareka.
10 M ya'amlɛog bɔɔd Zugsɔb la;
ka m siig mɔr sumalisim m Wina'am la yɛla.
Bɔzugɔ o yɛɛlim fukanɛ an faangir
ka bɔbim nɛ pʋpielim fuug
wʋʋ pu'apaal sidi na bɔbig o zug wʋʋ maanmaan nɛ,
ka nwɛnɛ pu'apaali maal o mɛŋ nɛ niŋgɔnkɔris.
11 Nwɛnɛ titan nɛ kɛt ka bʋmbʋta yit si'em
ka lɔmbɔn'ɔg mɛ kɛt ka ban bʋd si'el nɔbigid si'em la,
ala ka Zugsɔb onɛ an Paŋtita'ar Sɔb la mɛ na kɛ ka pʋpielim
nɔbigi bɛ tɛɛns wʋsa sʋʋgin.