Azaya 59

Tʋʋmbɛ'ɛd viigir nɛ faangir
1 Sida, Zugsɔb la nu'ug pʋ gimme galis nɛ on na faaɛn ya,
bɛɛ o tʋba li' ka o kʋ wʋmm.
2 Amaa ya tʋʋmbɛ'ɛd la wɛligi ya,
ya Wina'am la san'an;
ya tʋʋmbɛ'ɛd la kɛ ka o fɛndig ka basi ya,
ka pʋ wʋmi ya sɔsʋgɔ.
3 Bɔzugɔ ya anɛ ninkʋʋdib,
ka mɔri ya nu'usi tʋm tʋʋmbɛ'ɛd.
Ya nɔŋgbana pian'ad anɛ ziri,
ka ya zilima nyɔn ka pian'ad bugusim pian'ad.
4 Baa nid yinne pʋ dɔl sida suorɛ;
sɔ' pʋ tu'ad o antu'a ka li mɔr sidaa.
Ba ti'enɛ nɔŋgbannwa'ar nɛ faad;
ba gban'e nɛ yɛla pʋʋg ka du'a tʋʋmbɛ'ɛd.
5 Ba wiakid tʋʋmbɛ'ɛd wʋʋ wa'abɛ'og gɛla nɛ,
onɛ wʋsa ɔnbi ba gɛla na kpi,
ka fʋ ya'a nwa'ae gɛl yinne, wa'abɛ'ogʋ yit na.
Ba faad nwɛnɛ silinsin'ugʋ ʋgidi o paanlʋŋ si'em la.
6 Ba silinsi'ipaanlis la ka' vɔɔnrɛ,
bɔzugɔ ba kʋ nyaŋi nɔki maal fuugɔ;
ba kʋ nyaŋi pili ba mɛŋ nɛ ban ʋg si'el la.
Ba tʋʋma anɛ tʋʋmbɛ'ɛd,
ba nu'us la tʋʋma anɛ zaba ma'aa.
7 † Ba nɔba kennɛ tʋʋmbɛ'ɛd zin'igin tɔ'ɔtɔ;
ba zɔti tɔ'ɔtɔ ken ye ba kʋ nimbanɛ pʋ tʋm bɛ'ɛdɛ.
Ba mɔri bugusim pʋtɛnda;
ba suor wʋsa anɛ san'auŋ nɛ widigir.
8 Ba zi' sumbʋgʋsʋm suorɛ;
sida ka' ba san'anɛ.
Ba fɛndigi lɛb nɛ zam tʋʋma ni;
sɔ' kae dɔlli ba ka mi' sumbʋgʋsʋm.
9 Ala ka sida lal nɛ ti,
ka pʋpielim pʋ paadi tii.
Ti ieednɛ nɛɛsim, amaa si'el wʋsa anɛ zibisʋg;
ti bɔɔdnɛ lin na nie nyain, amaa ti kennɛ likin.

10 Ti nwɛnɛ zʋnzɔɔs ka babinnɛ dɔlisid dɔkpin,

ti babinnɛ ken wʋʋ nimbanɛ ka' ninii.
Nintansʋʋs ti tu'usidi lit wʋʋ li anɛ sisɔbir nɛ;
baa banɛ mɔr paŋ la sʋʋgin, tinam nwɛnɛ ninkpiilima nɛ.
11 Ti wʋsa bʋʋnnɛ wʋʋ bʋnyua nɛ;
ka ʋʋnsid wʋʋ dawana.
Ti ieedi sida, amaa ka pʋ nyɛɛ;
ti bɔɔd faangir, amaa ka li lalli ti.
12 Linɛ kɛ ka ti pɔ'ɔgir zu'oe fʋ tuon
ka ti tʋʋmbɛ'ɛd dii ti la.
Ti pɔ'ɔgir la bɛnɛ ti san'an saŋa wʋsa,
ka ti siak ye ti tʋm bɛ'ɛd.
13 Ti pian'ad ka' sida, ka ti zan'as Zugsɔb la nɔɔr
ka bidi ti Wina'am la kʋdig,
ti pian'adi ziri ka mugusidi ti taaba ka pʋ siakid sida,
ti pʋtɛnda gban'e nɛ dama'am ma'aa.
14 Linzug sida lɛb nɛ nya'aŋ
ka pʋpielim zi'e lallisa;
yɛlsida tu'ugi li suorin,
ka ba da'ae burikinnamɛ bas kpikpɛŋ sa.
15 Sɔ' lɛn zi' sida zin'iga,
ka onɛ wʋsa zan'as linɛ an bɛ'ɛd la liebi ba dataa.
Zugsɔb la gɔsi li ka li pʋ malis oo
sida ka'alim la zug.
16 O gɔsi nyɛ ka sɔ' kae
ka o sʋnf san'amnɛ sɔ' kae na sʋŋ la zug;
ala ka o mɛŋ nu'ug tʋʋma tis o faangir,
ka o mɛŋ pʋpielim la tis o paŋ.
17 † O nɔk pʋpielim ka li aan o gbanti'edʋg
ka faangir aan o kʋnt zupibig ka o pidi o zugin
ka yɛ fuug linɛ an sam yɔɔb
ka nɔk nimmua pil o mɛŋ wʋʋ fuug nɛ.
18 O dataasi tʋm si'em la,
ala ka o na yɔ sʋnpɛɛnni lɛbisi ba.
O na tɔndi paae o bi'emnam wʋsa,
ka yɔ tembanɛ ka ku'om gilig la linɛ nari ba.
19 Nidib banɛ bɛ ya-tuona la na zɔt Zugsɔb la yʋ'ʋr,
ka banɛ bɛ winnigi tansid zin'isi'a la na tis o na'am la girima.
O na kennɛ nwɛnɛ ku'om pʋbid nɛ paŋ,
ka li anɛ Zugsɔb la vʋ'ʋsʋm da'ae li mɔri keŋ.
20 Zugsɔb la yɛl ye, “Faangid la na kɛn Zion na,
o na faaɛn Jakob yidim banɛ viigi ba tʋʋmbɛ'ɛd ka tiak la.”
Ala ka Zugsɔb la yɛl.
21 Zugsɔb la yɛl ye, “Ya'a an mam, m nɔnaari nwa': m siig kanɛ bɛɛ fʋ ni la nɛ m pian'ad linɛ ka m niŋi fʋ nɔɔrin la kʋ yi fʋn bɛɛ fʋ biis bɛɛ fʋ yaas nɔɔrinɛ, lin yi nannanna mɔri ken sa.” Man Zugsɔb la yɛl.