AZAYA 55

Ba buol banɛ ka ku'onuud mɔri ba
1 † Zugsɔb la yɛl ye,
“Kemi na, yanam banɛ ka ku'onuud mɔri ya la,
kemi ku'om zin'igin na!
Yanam banɛ ka' ligidi la,
kemi na da' diie!
Kemi na da' daam nɛ bin'isim
ka da yɔ ligidii, li mɛ ka' sammɛ.
2 Bɔ ka ya san'amid ligidi nɛ linɛ ka' diibɔ,
ka gɛɛnd nɛ linɛ pʋ mɔr sʋŋirɛ?
Kɛlisimini m pian'ad, ka di linɛ an sʋm,
ka dikanɛ an sʋ'ʋŋa ka na malisi tisi ya.
3 Yɔ'ɔgimi ya tʋba ka kɛɛn m san'an na;
kɛlisimini m pian'ad, ka ya siig na paam vʋm.
M na maal nɔnaar linɛ ka' naar nɛ ya,
ka li anɛ m sida nɔŋilim linɛ ka m da kaanbi tis Na'ab David la.
4 Gɔsima, m da kɛ ka o an kasɛti tis nidib la,
ka an tɛɛns dim la tuongat nɛ ba kpɛɛm.
5 M yɛl o ye, ‘Sida fʋ na buol buudbanɛ ka fʋ zi' la la'as,
ka buudbanɛ zi'if la na zɔ tɔ'ɔtɔ kɛɛn fʋ san'an na,
ka li na anɛ fʋ Zugsɔb Wina'am la zug,
onɛ an Kasi tis Israel la,
bɔzugɔ onɛ kɛ ka fʋ an girima sɔb.’”
6 Dɛŋim iee Zugsɔb la saŋkanɛ ka ya na nyɛɛ o;
buolimin o on nam bɛ yammin la.
7 Kɛl ka bugusim sɔb bas o bugusim suoya
ka tʋʋmbɛ'ɛd sɔb kɛɛ o pʋtɛn'ɛbɛ'ɛd la.

Kɛl ka o lɛb Zugsɔb la san'an na ka o na zɔɔ o nimbaanlig,

ka lɛbi ti Wina'am la san'an na ka o na kɛɛ o tʋʋmbɛ'ɛdi bas.
8 Zugsɔb la yɛl ye, “Mam pʋtɛn'ɛr ka' ya pʋtɛndaa,
ka ya suoya mɛ ka' man suoya.
9 Nwɛnɛ agɔla lal nɛ teŋ si'em la,
ala ka m suoya lalli gati ya suoya
ka m pʋtɛnda mɛ gati ya pʋtɛnda.
10 Saa nɛ sakuga yit agɔla lit na
ka kʋ lɛb zaalim ka pʋ madig teŋgbauŋ la,
ka kɛt ka bʋmbʋta yitna ka maan puum,

nɛ zʋʋdi tisid onɛ bʋd la

nɛ diibi tisid onɛ dit la,
11 ala mɛn nɔɔ ka m pian'ad la kʋ yii m nɔɔrinɛ keŋ
ka lɛn lɛbi m san'an na zaalim,
amaa asɛɛ li maal mam bɔɔd si'el,
ka maal mam tʋmmi li si'el yɛla la.

12 Ya na yinɛ sumalisim

ka lɛb nɛ sumbʋgʋsʋm;
zuoya nɛ kʋkʋna
na yʋ'ʋmmi ya tuon,
ka tiis banɛ zi'e la wʋsa
na nwɛ'ɛdi ba nu'us pʋra-pʋra!
13 Kpʋkparig tiis na yi gɔn'ɔsi daa bɛ zin'isi'a la
ka tivɛnla yi zin'ikanɛ daa an sian'anr la.
Lina na an zanbin linɛ na bɛ saŋa wʋsa
ka na tiɛn ya man Zugsɔb la tʋm si'el.”