AZAYA 53

1 † Anɔ'ɔn niŋi ti labaar la yadda

ka anɔ'ɔn san'an ka Zugsɔb la nie o paŋi pa'alɛ?
2 Zugsɔb tʋmtʋm la nɔbig o san'an wʋʋ tikanɛ nam bun paalim
ka nwɛnɛ nya'ar kanɛ bɛ teŋ kpi'emis zin'igin nɛ.
O daa pʋ mɔr vɛnlim bɛɛ kpi'euŋ si'a na kɛ ka ti ya'am bɔɔd o.
On an si'em la pʋ tisi ti nyɛlʋg ka ti na kɛɛn o san'an naa.

3 Nidib daa nɛ'ɛs o ka zan'as o.

O daa anɛ ninkanɛ miilim pu'alʋŋ, nɛ tɔɔg nɛ namisʋg.
Sɔ' daa pʋn pʋ bɔɔd ye o gɔs oo;
ba daa nɛ'ɛs o ka tinam mɛ gɔs o zaalim.
4 † Li ya'a an sida, onɛ di'e ti niŋgbina tɔɔg
ka yisi ti ban'as wʋsa.
La'an nɛ wala ti tɛn'ɛs ye li anɛ Wina'am
kɛ ka yɛltɔɔd nɛ namisʋg nɛ mugusʋg paae o.
5 Amaa ba daa pu'alim o nɛ ti tʋʋmbɛ'ɛd yɛla,
tinam taal zug ka ba namis o;
ba daa namis o ka li kɛ ka ti nyɛ sumbʋgʋsʋm;
o pu'alʋŋ la zugʋ kɛ ka ti paam laafi.
6 Ti wʋsa nwɛnɛ pɛ'ɛs nɛ yirid kɔn'ɔb-kɔn'ɔb,
ti wʋsa yinne-yinne fɛndig nɛ ti ya'am bɔɔdim;
ka Zugsɔb la nɔki ti tʋʋmbɛ'ɛd la wʋsa ziil o.
7 Ba daa mugus o ka namis o,
la'an nɛ wala o pʋ ya'ae o nɔɔrɛ.
Ba daa mɔr o ken wʋʋ pɛribig ka ba mɔri kennɛ o kɔdigir zin'igin si'em la,

ka nwɛnɛ pɛ'og ka ba ye ba kiesi o kɔnbid nɛ ka o an baanlimm ka pʋ ya'ae o nɔɔrɛ

8 Ba daa mugus o ka kad o saria ka mɔr o keŋ.
Ka anɔ'ɔnɛ na nyaŋi pʋn tiɛn on kpi ka pʋ bas nya'aŋ la yɛllɛ?
Ba daa mugus o ka kʋʋ o
man nidib la tʋʋmbɛ'ɛd zug.
9 Ba daa tuu o yaʋgʋ la'as nɛ nimbɛ'ɛdnam,
ka on daa kpi la ba daa mum o kpan'am dim yaʋgʋn,
la'an nɛ on daa pʋ tʋm tʋʋmbɛ'ɛd
bɛɛ siak ka dama'am yii o nɔɔrin na la.
10 La'an nɛ wala linɛ niŋ o la daa anɛ Zugsɔb la bɔɔdim
ka Wina'am kɛ ka o nyɛ mugusʋg ka namis,
hali ka nɔk o nyɔvʋri maal maan.
Nɛ wala o na nyɛɛ o yaas ka o dabisa yuug,
ka Zugsɔb bɔɔdim na maal o bɛllimin.
11 O namisʋg nya'aŋ o na lɛn nyɛ sumalisim ka o pʋʋg pie;
o baŋ ye o namisʋg la ka' zaalim.
“M tʋmtʋm sʋŋ onɛ ka m nɔŋ la
na di'e namisʋg nidib pamm zug,
ka o yɛla ka m na kɛɛ ba taali bas.
12 Alazug m na tis o girima
nintitada nɛ kpi'emnam sʋʋgin.
Bɔzugɔ o nɔk o nyɔvʋri tis
ka kɛ ka ba kaal o paas tʋʋmbɛ'ɛd dimin ka kʋʋ oo.
O zi nidib bɛdegʋ tʋʋmbɛ'ɛd
ka sɔs Wina'am tisi ba ye o kɛɛ ba taali bas.”