AZAYA 52

Zion, duom ka zi'en nɛ paŋ!

1 Jerusalem, tempʋkanɛ an kasi la,

yɛɛmi fʋ fubanɛ vɛnl la!
Banɛ pʋ kpɛn' baŋʋ ka an dian'ad dim la
kʋ lɛn kpɛn' fʋ san'an na ya'asɛ.
2 Jerusalem, kpa'asim titan la bas;
duom keŋ zin'in na'am gbauŋ la zug.
Zion pu'ayua onɛ bɛ namisʋg pʋʋginɛ,
yidigim baans banɛ ka ba lɔɔ fʋ niŋgɔɔnr la ka nyɛ yɔlisim.
3 Zugsɔb la yɛl si'eli nwa':
“Ba daa kuosif nɛ zaalim ka pʋ di'e ligidii,
fʋ mɛ na nyɛ faangir zaalim ka kʋ yɔ ligidii.”
4 Zugsɔb onɛ an Paŋtita'ar Sɔb la yɛl ye,
“M nidib da dɛŋi keŋ Egipt ye ba zin' ani;
li nya'aŋ ka Asiria dim mugusi ba.”
5 Ka Zugsɔb la yɛl ye, “Gɔsima, nannanna nɛ'ɛŋa an bɔ?
Ba mɔri m nidib la keŋ zaalim-zaalim,
ka banɛ sʋ'oe ba la la'adi ba,
ka pian'ad bɛ'ɛdi san'amidi m yʋ'ʋr saŋa wʋsa.”

Zugsɔb la pian'ʋkʋ la.

6 “Dinzug ka m nidib la na baŋi m yʋ'ʋr;
di zug ka ba na baŋ
ye manɛ da dɛŋi yɛli zi'el.
Ɛɛn, li anɛ mam.”
7 † Banɛ mɔr labasʋŋʋ yit zuoya ni na la,
ba ken malisi ti sʋnf pamm!
Ban banɛ mɔɔn sumbʋgʋsʋm yɛla,
ka mɔr labasʋŋʋ kenna,
ka mɔɔn faangir yɛla,
ka yɛt Zion ye,
“Fʋ Wina'am la anɛ na'ab la!”
8 Kɛlisimi! Nimbanɛ gur teŋ la dʋ'ʋsi ba kʋkɔya;
ba la'asi tansid agɔla nɛ sumalisim.
Zugsɔb la ya'a ti lɛb Zion na,
ba na nyɛɛ o nɛ ba mɛŋ nini.
9 Jerusalem dinɛ an dabɔɔdɛ,
la'asim yʋ'ʋmmi nɛ sumalisim,
ka Zugsɔb la bʋgʋl o nidib sʋnya;
o faaɛn Jerusalem dim.
10 Zugsɔb la na pa'al o paŋ kanɛ an nyain la
buudi wʋsa tuon,
ka banɛ bɛ teŋ-magbinnin sa na nyɛɛ
ti Wina'am la faangir.
11 † Yimi, yimi anina na!
Da si'isi bʋn linɛ an dian'adɛ!
Yim anina na ka maali ya mɛŋ nyain,

yanam banɛ ziid Zugsɔb la'ad la.

12 Amaa ya kʋ yinɛ tʋkpiidʋg nwɛnɛ ba mugusidi ya nɛ
bɛɛ ya zɔt wʋʋ banɛ ka ba kata;
Zugsɔb la na gaadi ya tuon,
Israel Wina'am la na bɛɛ ya nya'aŋi guri ya mɛn.
Tʋmtʋm la namisʋg nɛ na'am kanɛ ka o na nyɛ la yɛla
13 Zugsɔb la yɛt ye,
“Gɔsima, m tʋmtʋm la na tʋm nɛ ya'am.
Ba na dʋ'ʋs o agɔla ka na'as o.
14 Nwɛnɛ nidib bɛdegʋ daa nyɛɛ o ka li paki ba si'em,
ka o nindaa tiak hali ka o pʋ lɛn nwɛnɛ ninsaala,
ka o niŋgbina wʋsa san'am ka sɔ' pʋ lɛm baŋ ye li anɛ on la,
15 † ala ka o na kɛ ka tɛɛns pamm lidig
ka na'anam mak pian'adi gʋ'ʋŋ ka gigilim o yɛla.
Ban da yɛli ba si'el o yɛla la, ba na nyɛɛ li,

ka ban nam pʋ wʋm si'el yɛla la, ba na gban'e li gbin.”