AZAYA 47

Babilon liig yɛla
1 “Babilon pu'ayua, sigim teŋin,
zin'inim uusʋgin, zin'inim teŋin,
fʋ kʋ nyɛ na'am gbauŋʋ zin'inɛ.
Ba kʋ lɛm buonif ye girima sɔb bɛɛ onɛ vɛnla.
2 Nɔkim nɛɛri nɛɛm zɔ'ɔm;
yisimi fʋ bɔbig la.
Dʋ'ʋsimi fʋ fuug la ka kɛɛ fʋ nɔba
la zaalim lɔ'ɔŋ kɔlis la.
3 Ba na nyɛɛ fʋ sanwɛɛr
ka fʋ nyan yi paalʋ.
M na yɔ sam;
ka kʋ bas baa nid yinnee.”
4 Onɛ aan ti Faangid nɛ ti Zugsɔb Paŋtita'ar Sɔb la,
o yʋ'ʋri an Israel dim Wina'am Onɛ An Kasi la.
5 “Babilon dim pu'ayua,
zin'inim likin baanlimm,
ba kʋ lɛm buonif ye,
tɛɛns pu'ana'aba.
6 M sʋnf da pɛlig nɛ m nidib la
ka m niŋi ba wʋʋ ba ka' m dinnɛ;
m nɔki ba niŋi fʋ nu'usin,
ka fʋ pʋ zɔɔ ba nimbaanliga.
Hali la'an nɛ banɛ kʋdig la,
ya nɔk zitɛbisa ziili ba.
7 Fʋ tɛn'ɛsi fʋ pʋtɛn'ɛrin
ye, ‘M na kpɛn an pu'ana'ab saŋa wʋsa!’
Amaa fʋ pʋ tɛn'ɛs nɛ'ɛnam yɛla
bɛɛ linɛ na ti niŋɛ.
8 Nannanna kɛlisim sʋ'ʋŋa,
fʋn kanɛ tʋmmi fʋ ya'amlɛog bɔɔdim,
ka tɛn'ɛs ye si'el-si'el kʋ niŋi fɔ,

ka yɛt ye, ‘Manɛ bɛ ka sɔ' lɛn kae paae mam.

Mam kʋdim kʋ lieb pʋkɔɔnr
bɛɛ m biis kpi ka kɛɛ ma.’
9 Bʋnama ayi' nwa' na ba'asi tʋm
dabisir yinne pɔɔgin, ka li mɛ kʋ yuugɛ;
fʋ biis na kpi ka fʋ mɛ na lieb pʋkɔɔnr.
Li na kɛɛn fʋ san'an na ka li wʋmif,
la'an nɛ fʋn an sɔnpʋt nɛ ba'akɔlʋg sɔb
ka tʋm nyalima la.

10 Fʋ ti'enɛ bugusim tʋʋma ma'aa,

ka yɛl ye, ‘Sɔ' pʋ nyɛti ma.’
Fʋ ya'am nɛ fʋ baŋir la bɔdisif nɛ.
Lin ka fʋ yɛti fʋ mɛŋ ye,
‘Manɛ bɛ ka sɔ' lɛn ka' paam la.’
11 Tɔɔg na lii fʋ zugin,
ka fʋ zi' fʋn na niŋ si'em yii li pʋʋginɛ.
Yɛlta'ada na paaf
ka fʋ kʋ nyaŋi maal maana yii li pʋʋginɛ;
namisʋg linɛ ka fʋ kʋ dɛŋi baŋi li yɛla
na libigif.
12 Kem tuon, nɛ fʋn nyalimid nidib si'em
nɛ fʋ sɔnpʋt nɛ fʋ ba'akɔlʋg tʋʋma
linɛ ka fʋ mɔri tʋmmi fʋ biilimin sa la.
Daasi'erɛ fʋ na nyaŋi nɔki li
kpɛn'ɛs nidib dabiem.
13 Sa'al banɛ ka ba tisif la wʋsa gɛɛnsif nɛ!
Kɛl ka fʋ nimbanɛ zamis nwadbibis yɛla la yi tuon na.
Ban banɛ yɛt linɛ saa na maal bɛog sa la.
Fʋ nimbanɛ gɔsid nwadbibis
ka yɛtif linɛ na maal bɛog sa nwadig-nwadig wʋsa la,
kɛl ka ba faaɛn fʋ yis bʋn linɛ kennɛ fʋ zugin na la.
14 Sida ba nwɛnɛ kikan'a nɛ ka bugum dii ba.
Hali ba kʋ nyaŋi faaɛn ba mɛŋ
bugum tita'ar la pʋʋginɛ.
Li ka' bugumsaana ka sɔ' na ʋʋs,
bɛɛ zin'inɛ kpi'enɛ.
15 Fʋ tʋm nɛ nimbama nwa',
ka ba bɛ nɛf hali fʋ biilimin sa
amaa ba kʋ nyaŋi sʋŋi fɔ.
Ba wʋsa na keŋi ba ken zin'ig;
ka baa yinne kʋ kpɛlim faaɛn fɔ.”