AZAYA 27

Israel faangir yɛla
1 Daakan la Zugsɔb la na zaŋi o zaba sʋ'ʋg kanɛ san'amid nidib la;
linɛ zu'oe hali ka kʋʋd nidib ka dabiem bɛ la.
O na namis wa'akanɛ yʋ'ʋri buon Lɛviatan,
ka o ian'ad ka nwɛɛlim o mɛŋ hali la,
Zugsɔb la na kʋʋ atɛukʋn bʋnyua la.
2 Daakan la, yʋ'ʋmmi tiwanna pɔɔg linɛ wan sʋ'ʋŋa la yɛla.
3 Mam kanɛ an Zugsɔb la guri li,
ka dɔn'ɔsidi li saŋa wʋsa.
M guri li yʋ'ʋŋ nɛ nintaŋ
ka sɔ' kʋ nyaŋi daami lii.
4 M sʋnf pʋ pɛligɛ,
baa gauŋ nɛ gɔn'ɔs ya'a daamidim,
m na zabi vɔɔn li ka li kpi,
ka nyu'oe li wʋsa bugum.
5 Ya'a ka' ala kɛl ka ba kɛɛn m san'an na su'a.
Kɛl ka ba mɔr sumbʋgʋsʋm nɛ mam,
sida kɛl ka ba mɔr sumbʋgʋsʋm nɛ mam.
6 Dabisa kenna ka Jakob na ba'a nya'a,
Israel na tɔn wila ka pu puum
ka kɛ ka dunia la pɛ'ɛl nɛ li wala.
7 Zugsɔb la nwɛ' o wʋʋ on nwɛ' banɛ daa nwɛ' o laa?
O kʋʋ o wʋʋ banɛ daa kʋʋ o ka o kʋʋ ba si'em laa?
8 Zugsɔb la da namis o nidib la ka kɛ ka ba mɔri ba keŋ teŋ zʋŋ,
o sʋnf da duoe nɛ ba hali ka o kadi baa yis
wʋʋ ya-nya'aŋ sisi'em da'ae ba keŋ sa nɛ.
9 † Nɛ'ɛŋa zug ka ba na kɛ Jakob yidim tʋʋmbɛ'ɛdi bas,
ka ban na niŋ si'em nwa' ka di pa'al ye ba yisi ba tʋʋmbɛ'ɛdi bas:
ba na yis kuga banɛ bɛ bimbima la ni nwa'ae ba
ka nɛɛmi li bugusi bugus;
ka Asera teŋgban daad kʋ lɛm bɛɛ,
nɛ bimbim banɛ ka ba nyu'od bʋnnyubisa li zugʋ tisid wina la.
10 Tempʋkanɛ mɔr kpi'euŋ la lieb dabɔɔg,
zin'ikanɛ ka nidib daa zin' la yʋ'ʋn nwɛnɛ sian'anr nɛ.
Ani ka niigi ɔnbid ka digi;
ka fanrisi li vaand la wʋsa.
11 Wil banɛ mɔr vanmɛna la ya'a kʋdig,
li na kɔ'ɔgi li ka pu'ab kena pi'isi nyu'oe bugum.
Nimbama pʋ gban'ad pian'ad gbinnɛ;
alazug, onɛ maali ba la pʋ zɔti ba nimbaanlig
bɛɛ o mɔri ba nyɔɔgɔ.
12 Li saŋa ya'a ti paae, lin yi Efiritis kɔldaugʋ pʋbidi yit zin'isi'a la ti paae kɔlbil linɛ bɛ Egipt teŋ titɔndigin la, Zugsɔb la na wɛlig o nidibi yis wʋʋ ki ka ba bʋ'ʋdi yɛligid si'em la, amaa yanam Israel dima, Zugsɔb la na la'asi ya yinne-yinne. 13 Li daar ya'a paae, ba na pieb na'atantita'ar, ka banɛ bɛ Asiria bɔɔd bɔdigir la, nɛ banɛ da zɔɔ keŋ Egipt la, na lɛb na zun'e Zugsɔb la Jerusalem zuokanɛ an kasi la ni.