AZAYA 26

Zun'or yʋʋma
1 Daakan la ba na yʋ'ʋm yʋʋm kaŋa Juda teŋin:
Ti mɔr tempʋkanɛ kpi'em!
Wina'am maal faangiri tisi ti
wʋʋ zaŋguoma linɛ mɔr paŋ nɛ.
2 Yɔ'ɔgim za'anɔɔri tis buudkanɛ an pʋpielim dim la
ka ba kpɛn', buudbanɛ an yadda dim la.
3 Fʋ na kɛ ka sumbʋgʋsʋm bɛ nɛ onɛ yadda niŋiri zi'e kiŋ-kiŋ la
bɔzugɔ, on niŋif yadda sʋ'ʋŋa la zug.
4 Niŋim Zugsɔb la yadda saŋa wʋsa,
bɔzugɔ Zugsɔb la an tampiing kanɛ bɛ saŋa kanɛ ka' naarɛ.
5 O sigis banɛ dʋ'ʋsi ba mɛŋ la,
ka nwɛ' tempʋkanɛ zi'e agɔla la sigis teŋin;
o da'ae li bas ka li naalim nɛ titan.
6 Ba nɔɔ li nɛ nɔba digil teŋin.
Banɛ ka ba daa mugusidi ba la nɔɔ li,
nɔŋ dim la nɔɔ li nɛ ba nɔba.
7 Pʋpielim dim la suor anɛ sassi;
Fʋn kanɛ an burikin la
kɛya ka pʋpielim dim suor an sʋ'ʋŋa.
8 Ɛɛn, Zugsɔba, ti dɔlli fʋ wada la suor ka gu'usidif,
fʋ yʋ'ʋr la an sʋm hali, ka ti ya'am bɔɔd.
9 Yʋ'ʋŋ wʋsa m ya'amlɛog bɛ nɛ fʋ san'an,
ka m siig ieedi fʋ zin'ig bɛkɛung wʋsa.
Fʋ sida pian'adi nie dunia ni la,
dunia nidib baŋi fʋ pʋpielim an si'em.
10 La'an nɛ fʋn maal suguru tis bugusnam la
ba pʋ zamis pʋpielim ya'am.
Hali la'an nɛ yɛlsida dim teŋin,
ba nan kpɛn tʋmnɛ bɛ'ɛd
ka ba ba'a ka' nɛ Zugsɔb la paŋi an si'em la.
11 Zugsɔba, fʋ paŋ la zu'oya
amaa ba pʋ nyɛti li.
Kɛl ka ba nyɛ fʋn bɔɔdi fʋ nidib la yɛla si'em ka nyan dii ba;
kɛl ka bugum kanɛ ka fʋ maali guri fʋ bi'emnam la dii ba.
12 Zugsɔba, fʋ kɛya ka ti zin' nɛ sumalisim,
ka tinamɛ maal si'el la wʋsa, fʋnɛ tʋmi li tisi ti.
13 Zugsɔb onɛ aan ti Wina'am, winsieba da sʋ'oe ti,
amaa fʋ ma'aa ka tinam na'asid.
14 Ba kpiya, ba pʋ lɛn vʋe yaa,
banɛ kpii gaad la kʋ lɛn duoe ya'asɛ.
Fʋ namisi ba ka kɛ ka ba paam san'auŋ,
fʋ uusi ba ka sɔ' pʋ lɛn tɛnri ba yɛla ya'asɛ.
15 Zugsɔba, fʋ yalig buudi la,
ɛɛn, fʋ sid yalig buudi la.
Fʋ yalig teŋ la titɔndis
ka dinzug ka fʋ yʋ'ʋr paam girima.
16 Zugsɔba, fʋn namisi fʋ nidib la,
ba kɛɛn fʋ san'an na nɛ sʋnsa'aŋ,
ka nya'am nɛ winsɔsʋg.
17 Zugsɔba, nwɛnɛ pu'a na sa'ae bɔɔd du'ab
ka li zabid ka o nwɛɛn ka kaasid si'em la,
ala ka ti daa bɛɛ fʋ tuon.
18 Ti daa mɔri pʋʋg,
ka li zabid ka ti nwɛɛn,
amaa ti du'anɛ zaalim.
Ti pʋ tis dunia la faangirɛ;
ti pʋ nyaŋi du'a biisi tis dunia la.
19 Amaa ya nimbanɛ kpi la na vʋ'ʋg;
ba niŋgbina la na vʋ'ʋgi yi kumin.
Yanam banɛ dig yaʋgʋn la,
duom tansi ka yʋ'ʋm nɛ sumalisim,
bɔzugɔ ya yʋ'ʋn nwɛnɛ bɛogʋn mɛligim nɛ,
teŋ la na duos banɛ kpii bɛɛ o ni la wʋsa.
20 M nidiba kpɛn'ɛminɛ ya dɔɔdin ka yɔ' dalamma la lɛbis;
Su'amini ya mɛŋ bi'ela, hali ka o sʋnpɛɛn la ti gaad.
21 Gɔsima, Zugsɔb la yii o bɛllim zin'igi kenna
ye o namis dunia nidib, ba tʋʋmbɛ'ɛd la zug.
Teŋ la na yis banɛ ka ba kʋʋ ba dʋ'ʋs na,
o kʋ lɛn su'a banɛ ka ba kʋʋ ba la.