Azaya 15

Zugsɔb la pian' Moab yɛla 1 Labakaŋa anɛ Moab yɛla: Ar tempʋʋg linɛ bɛ Moab sʋ'ʋlimin la lieb dabɔɔg. Yʋ'ʋŋ yinne ka li san'am! Kir tempʋʋg linɛ bɛ Moab sʋ'ʋlimin la lieb dabɔɔg. Yʋ'ʋŋ yinne ka li san'am!

2 Dibon dim keŋi ba pʋ'ʋsim zin'igin;

ba keŋi ba zuoya la ni kum; Moab dim la kaasid Nebo nɛ Medeba tɛɛns yɛla. Ba wʋsa pʋni ba zut ka kɔɔnsi ba tiemis ba sʋnsa'aŋ zug ka li tɔi hali. 3 Dinzug ka ba yɛ bɔto fuudi bɛ suoraadin, ka sieba dʋ dɔɔd zugʋ kaasid, ka sieba vanb nidibi la'asid zin'isi'a wʋsa kaasid. 4 Hesbon nɛ Eleale tɛɛns dim kaasid nɛ, ka ba kaasig la keŋ paae Jahaz teŋin. Dinzug ka Moab zabzabidib la nwɛ' kuŋ ka ba niŋgbina kpi. 5 M kaasidi m sʋnfʋn Moab yɛla, nidib la zɔ hali ti paae Zoar teŋin, ka gaadi paae Eglaf Sielisiya. Ba sieba dɔl suor la dʋ paae Luhif teŋin, ba kennɛ ka kaasid, ban dɔl suori wa'ae Horonam la, ka kum, san'auŋ kanɛ paae ba la yɛla. 6 Nimirim kɔlis la kpiɛn ya, ka mɔɔd kʋdig, tiis nɛ mɔɔd la wʋsa zɛndig ya, ka fʋ kʋ lɛn nyɛ mɔma'asa, hali baa bi'elaa. 7 Kpan'am linɛ ka ba nyɛ ka su'a li la, ba kpilimi li wʋsa zii lɔ'ɔŋ kɔldabʋmbɔk la gaad. 8 Ba kaasig la paae Moab titɔndis bɛn, ba kaasig la lalig nɛ hali ti paae Eglam tempʋʋgin, ba kukuma la laligi paae Beer Elim. 9 Dimon kɔlis la wʋsa pɛ'ɛli nɛ ziim, amaa bɛ'ɛd na lɛn ken Dimon teŋin na gaad ala, gbigim na gban'e banɛ zɔɔ yit Moab teŋin la nɛ banɛ kpɛlim bɛ teŋin la wʋsa.